Firwat ass Vullendreck wäiss?

07.07.17

FNRDiesen Artikel drucken

Um Auto nervt et jo besonnesch wann sou Vullenkacka, oder méi héiflech Villercherskot matten op der viischter Face lant. E Mister Science-Nolauschterer wollt wësse firwat dee wäiss ass...d’Vigel friesse jo awer keng wäiss Saachen... ?

Dat ass richteg. Et ass haaptsächlech den Alter vum Vullendreck, dee fir d‘Faarf eng Roll spillt!

Frësche Vullendreck ass heefeg liicht gefierft - mee wanns de e bis gesäis ass e meeschtens verdréchent an duerch d’UV Strale vun der Sonn verblatzt. Mee mol eng Géigefro: Hues de dech scho mol gefrot wéi Vigel pissen?

Ooh! De wäisse Vugeldreck ass hiren Urin?

Bal. Et ass eigentlech Urin a Kot gläichzäiteg. D’Villercher, am Géigesaz zum Mënsch, hu just een eenzegen Ausgang fir hier Exkrementer ze eliminéieren: d’Kloak.

Dat heescht alles vermëscht sech am Villchen a kënnt da wäiss eraus?

Déi zwee kënnen zesummen erauskommen, mee dat ass net de Grond vun der wäisser Faarf. Am Villerchers Urin ass staark konzentréiert Harnsaier – Villercher drénken net vill fir méiglechst liicht ze sinn. Dësen duerchsiichtegen an déckflëssegen Urin, duerchleeft e puer Statiounen am Kierper.

Op all Etapp, lafe verschidde chemesch Reaktiounen of déi d’Harnsaier an eng wäiss Mass, den Urat, ëmwandelen, an dat ass eng Aart Salz. Dat gesäis de dann op denger Fënster oder...op denger Schëller.

An de Kot huet keng Faarf?

Dach – meeschtens ass jo och nach bëssen Donkeles mat deem wäisse vermëscht. Fir en Expert ass e Vullendreck eppes wéi eng kleng Enzyklopedie: d’Gréisst, d’Ausgesinn an d’Faarf verroden sou munches iwwert d’Vullenaart: d’Geschlecht, den Alter an hier Ernärung ...– zimlech faszinant!

Da kucken ech mer déi Fläpp an Zukunft mol och méi genee un ...

Auteur: Constance Lausecker (FNR)
Editeur: Joseph Rodesch (FNR) 
Foto: Shotshop

 

Auch in dieser Rubrik

Liichtplanzen: Kënnen iergendwann liichtend Beem Luuchten ersetzen?

13.06.18 „Eis Visioun ass et, eng Planz ze entwéckelen, déi als Bürosluucht benotzt gëtt“, doru gleeft e Fuerscher vum renomméierte Massachusetts Institute of Techno...> Ganzen Artikel lesen

Parkinson-Studie: Firwat maache Fuerscher aus Haut Gehir?

07.05.18 Fir u lieweg Gehirzellen erun ze kommen, ziichte Fuerscher dës aus Hautzellen, fir am Kader vun enger Etüde iwwer Parkinson drun ze fuerschen. > Ganzen Artikel lesen

Ginn et Déieren, déi net schlofe mussen?

26.03.18 Mr Science, dëse Weekend war ech esou groggi – ech hu bal nëmme geschlof. Iergendwéi ass dat jo och Zäitverschwendung.> Ganzen Artikel lesen

Gefillten Temperaturen: Wisou et dobaussen heiansdo méi kal schéngt, wéi et ass

28.02.18 D'Wiederprevisiounë ginn net nëmmen déi Temperaturen un, déi den Thermometer den Dag drop moosse wäert, mee dacks och déi gefillten Temperatur. Wat ass dat? > Ganzen Artikel lesen

Zerstéiert Alkohol wierklech Gehirzellen?

12.02.18 E puer iwwert den Duuscht gedronk, an den Dag drop kaum nach Erënnerungen...heescht dat, datt vill Gehierzelle futti gaang sinn? > Ganzen Artikel lesen

Verwandte Themen