Wéi vill Fuerschung stécht am Stol?

03.12.15

FNRDiesen Artikel drucken
Aus Stol gi Bürosklameren oder Autoe gemaach an ouni Stolträger géif et keng Héichhaiser ginn. D’Produktioun vu Stol huet sech säit iwwer 3000 Joren ëmmer weider entwéckelt. Elo wëllen Ingenieure fir d’éischte Kéier eng stole Bréck printen.
Mr. Science, wéi soll dat da goen,matt Stol printen?

Jo, do hues de richteg héieren. Zu Amsterdam soll eng Bréck iwwert eng Gracht geprint ginn. Dat funktionéiert wéi mat engem Tëntestrahldrécker: Amplaz mat Tënt soll d’Bréck awer mat flëssege Stoldrëpse gedréckt ginn a vu Roboteren Drëps vir Drëps direkt op der Plaatz opgebaut ginn.

A wéini soll dës Bréck fäerdeg sinn?

Wann alles gutt geet Enn 2017. Eng bësschen aner Stol-Dréckmethod gëtt haut scho routineméisseg agesat, awer fir méi kleng Géigestänn. Dobäi fiert en Laser-Drockkapp iwwert eng Bidde mat rengem Stolpolver, an ëmmer, wann de Laser opblëtzt, schmëlzt en de Stolpolver op deem Punkt wou en optrëfft. Wann den Laserkapp een Niveau ofgeschafft huet, gëtt eng nei hauchdënn Schicht Stolpolver opgedroen. Ëmmer do, wou den Objet dono aus festem Stol bestoe soll, schmëlzt de Laser déi nächst Schicht drop. Sou wiisst scheiweweis de Stolobjet. Ingenieure produzéieren somatt där Method  Maschinenstécker fir Prototypen. Op dës Aart a Weis ass awer och schonn eng Pistoul aus Stol gedréckt ginn déi funktionéiert.

Scho verréckt, wat sech d’Ingenieuren ëmmer rëm afale loossen?

Allerdéngs! Säit iwwer 3000 Joer tüftelt de Mënsch un der Produktioun vu Stol rondrëm – mat ville Versich a Mësselen. Ab dem Enn vum 18. Jorhonnert hunn d’Fuerscher dunn ugefaang ze verstoen, wat fir eng chemesch Reaktiounen dobäi oflafen. Si erkennen, dass d’Matière Première, also Eisenäerz eng Verbindung tëscht Eisen a Sauerstoff ass – ähnlech wéi Rascht. Am Héichuewe gëtt d’Eisenäerz zesumme mat Koks erhëtzt, dat ass eng speziell Kuel. Dobäi gëtt dem gléienden Äerz duerch eng chemesch Reaktioun de Sauerstoff entzunn. Sou entsteet geschmolzend Eisen, dat ënnen offléisse kann. En Héichuewen ass am Prinzip en risegt Reagenzglas!

Et fillt een sech winzeg, wann ee virun engem steet!

Nach ass am Réieisen awer nach ze vill Kuelestoff. Deen gëtt dann duerch aner chemesch Reaktiounen aus der Schmelz erausgeholl an zum Schluss kennt Stol eraus. Iwwer 3000 verschidden Zorte gëtt et haut, jee no Asaatzgebidd. Dass een awer iergendwann mol eng Kéier Stol drécke kéint, konnten sech och d’Fuerscher laang net virstellen.

Dofir bleift Fuerschung ëmmer spannend!

Du schwätz mer aus der Séil!

Auteur: Ingo Knopf
Editeur: Joseph Rodesch (FNR)

Traducteur: Sophie Steinmetz
Photo: Pixabay

Auch in dieser Rubrik

Wat ass d’Zukunft vun den Elektroautoen?

04.12.17 Brécht eist Stroumnetz mat den Elektroautoen zesummen? > Ganzen Artikel lesen

Virtual Reality: Just fir Geeks, oder eppes fir jiddereen?

12.10.17 D'virtuell Realitéit gëtt ëmmer méi accessibel fir jiddereen. Wat ass et a wat kënnt op eis duer? > Ganzen Artikel lesen

Mat engem Seel bis an de Weltall klammen?

13.04.17 D’Iddi klengt fantastesch, mee munch Experten halen et prinzipiell fir méiglech: Mat engem Seel amplaz vun enger Rakéit an de Weltraum kommen. Wéi ee Seel b...> Ganzen Artikel lesen

Wéi vill Fuerschung stécht am Fotoobjektiv?

15.03.17 Fuerscher liwweren sech eng Competitioun em dat klengsten Objektiv vun der Welt. Dat klengste miesst mëttlerweil manner wei ee Millimeter. > Ganzen Artikel lesen

Wéi vill Fuerschung stécht am Brout?

20.02.17 Wisou freeën sech Wëssenschaftler iwwer verbrannte Brout? > Ganzen Artikel lesen

Infobox

Mr Science op RTL Radio

All 2 Wochen présentéiert de Mr Science op RTL Radio wat fir eng Fuerschung hannert engem Objet aus dem Alldag stécht.


Verwandte Themen