Wéi vill Fuerschung stécht am Urin?

10.03.16

FNRDiesen Artikel drucken
Wisou richt Urin nom Spargeliessen sou komesch? A wisou ass fir munch Fuerscher de Geroch vun Urin méi opreegend wéi Parfum?
Mr.Science, lo mol am Eescht: Et gi Fuerscher déi un Urin richen?

Jo! Se hunn sech zum Beispill gefrot, wisou den Urin nom Iesse vu Spargelen sou charakteristesch richt.

An wat hunn se erausfonnt?

Se ginn dovun aus, dass dëse Geroch vu speziellen Inhaltsstoffer am Spargel kennt. Déi gi vum Stoffwiessel am Kierper verännert a richen dann désagreabel. Mat dem Urin ginn se eliminéiert. D’Fuerscher verdächtegen 22 Substanzen, allerdéngs konnten se bis haut nach net erausfannen, wat fir eng oder wat fir eng Kombinatioun vun dëse Substanze fir dëse Geroch verantwortlech ass.

Deen Geroch ass awer keng Krankheet, wisou erfuerschen d’Wëssenschaftler iwwerhaapt sou eppes?

Um Spargel-Urin hunn se aus rengem Virwëtz erfuerscht. Dat ass Grondlaagefuerschung. Vill méi Energie gëtt allerdéngs an d’Erfuersche vum Uringeroch gestach, dee Liewe rette kéint.

De Geroch vun Urin ka Liewe retten?

Jo. Den Urin ass nämlech souzesoen d’Ofwaasser vum Kierper. Dora lande vill Endprodukter aus eisem Stoffwiessel an dëse kann sech während enger Krankheet veränneren. An der Ufanksphase vun der Medezin hunn Dokteren sech ganz intensiv mat Urin beschäftegt. Se hunn en souguer geschmaacht, fir bestëmmte Krankheeten ze erkennen!

Uhh, eekleg!

Jo, déi ware schonn zimlech engagéiert ...Routineméisseg gëtt Urin haut virun allem fir Schnelltester agesat, fir zum Beispill Nierenerkrankungen, Bloseninfektiounen oder Diabetes ze erkennen. An am bekanntsten ass natierlechde Schwangerschaftstest mam Urin. Säit e puer Joer experimentéiere Medeziner elo mat speziell trainéierten Hënn, déi mat hiren empfindlechen Nuesen a munche Fäll Kriibs am Urin erausriche kennen.

Wouru richen se dat?

Dat wéissten d’Fuerscher och gären. Mee et geet hinnen dobäi wéi beim Spargelgeroch. Se wëssen, dass bei bestëmmte Kriibszorte speziell chemesch Verbindunge mam Urin eliminéiert ginn. Mee et si ganz vill verschidde Substanzen, a vill dovunner kennen d’Fuerscher nach guer net. D’Hondsnues kann awer anscheinend d’Urinprouwen an hire spezielle Gerochskombinatiounen ënnerscheeden. Dat sollen demnächst och sougenannten elektronesch Nuese kennen, also Sensoren, déi ganz vill verschidde Gerécher gläichzäiteg erkenne kennen. Déi wären da méi praktesch fir d'Routine an der Medezin. Allerdéngs ass d’Hondsnues am Moment nach besser.

Do kann ee just stauen, wat alles am Urin stécht.

Dofir ass Fuerschung jo ëmmer spannend!

 

Auteur: Ingo Knopf
Editeur: Joseph Rodesch (FNR)
Traducteur: Sophie Steinmetz
Photo: Pixabay

Auch in dieser Rubrik

Kleeder aus Spanneseid?

22.06.17 Spanneseid ass bal sou stabil wéi Stol, ma vill méi liicht. Fuerscher probéieren ëmmer méi Produiten aus Spanneseidproteinen hierzestellen, a brauche fir d'...> Ganzen Artikel lesen

Kann ee Blutt kënschtlech hierstellen?

24.05.17 Säit ronn 100 Joer rette Blutt-Transfusioune Mënscheliewen. Mee et spenden ze wéineg Mënsche Blutt. Kënnen d'Fuerscher da kee Blutt am Labo hierstellen? > Ganzen Artikel lesen

Ass d'Banann vum Ausstierwe bedroht?

16.05.17 Wa Planzefuerscher sech net ustrengen, wäerte Bananne villäicht gläich erëm richteg seele sinn. Firwat? A ginn et Léisungen? > Ganzen Artikel lesen

Wéi vill Fuerschung stécht am Kaffi?

30.01.17 Wisou moosse Fuerscher de Koffeingehalt vum Mierwaasser? > Ganzen Artikel lesen

Wéi vill Fuerschung stécht am Jughurt?

04.01.17 Ass probiotesche Jughurt gutt fir d’Gesondheet? > Ganzen Artikel lesen

Infobox

Mr Science op RTL Radio

All 2 Wochen présentéiert de Mr Science op RTL Radio wat fir eng Fuerschung hannert engem Objet aus dem Alldag stécht.