Asteroid Day 2017: Live-Stream vu Lëtzebuerg an d’ganz Welt

28.06.17

Asteroid Day
MNHN
Luxembourg Science Centre
Diesen Artikel drucken

Dëse Freiden, 30. Juni, diskutéieren Astronauten, Astrophysiker an Asteroiden-Expert’en iwwer méiglech (positiv an negativ) Impakter vun de “Weltall-Fielsen”.

Asteroiden sinn Objet’en déi engem Fiels ähnelen a sinn Iwwerreschter vun der Formatioun vu Planéiten an eisem Sonnesystem. Wéi Planéiten dréien si och ronderëm d’Sonn. Déi meescht vun hinnen am sougenannten Asteroidengürtel tëscht dem Mars an dem Jupiter.

Honnerte vu Meteoritten treffen d’Äerd all Dag an et ginn ongeféiert 1 Millioun Asteroiden, déi mer nach net identifizéiert hunn. Asteroide stellen also eng potenziell Gefor fir eis Äerd duer, well d’Méiglechkeet besteet, dass eng Kéier ee groussen eis Äerd trëfft. Dat war och den Ustouss fir de weltwäiten Asteroid Day ze grënnen.  Den Asteroid Day ass e globale Bildungsdag vun der UN. E gëtt all Joer den 30. Juni ofgehalen, de Joresdag vun deem gréissten Asteroiden-Impakt an der rezenter Weltgeschicht (Tunguska, Sibirien, 30. Juni 1908).

Asteroid Day: iwwer potenziell Impakter fir eis Äerd ze sensibiliséieren

Ziel vum Asteroid Day ass iwwer Asteroiden ze sensibiliséieren, an iwwer hier poteziell Impakter fir eis Äerd ze schwätzen. Woubäi et och em positiv Impakter goe kann: d’Letzebuerger Space Mining Initiative Spaceressources.lu wëll an Zukunft Biergbau op Asteroide bedreiwen – an doduerch nei wirtschaftlech Retombéeë fir eis Land kreéieren.  

Sou ass et dann och keen Zoufall dass Lëtzebuerg dëst Joer Gastgeber vum Asteroid Day ass – mat enger Live Iwwerdroung vun Tables Rondes aus dem RTL City Studio an enger Live-Schaltung an de Luxembourg Science Centre.

Live-Iwwerdroung vu Lëtzebuerg

Am RTL City Studio ginn ab 12 Auer mëttes (lokal Zäit) Tables Rondes mat Expert’en aus der ganzer Welt iwwerdroen. Jidderee kann déi iwwert den Internet kucken (hei de Link op d'Sait vum Asteroid Day fir d’Live-Iwwerdroung).

Ziel ass et eng global Diskussioun iwwert déi wichtegst Asteroide-Missiounen an nei Entdeckunge mat internationale Wëssenschaftler an Expert’en ze féieren. Moderéiert ginn d’Tables Rondes vun enger Rei internationaler a lokaler Journalisten a Médiateurs Scientifiques

Ënnert de Speaker si folgend Leit vu Lëtzebuerg mat dobäi :

• Matt Dawson Amateur-Astronom a wëssenschaftleche Mataarbechter vun MNHN ;
• Etienne Schneider, Wirtschaftsminister an déi dreiwend Kraaft hannert der Spaceresources.lu Initiative ;
• Kyle Acierno, Managing Director vun ispace Europe, eng international Firma, déi sech fir Ressourcen um Mond interesséiert a sait kuerzem och Büroen zu Lëtzebuerg huet;
• Jean-Louis Schiltz, Affekot a Consultant am Droit vun Technologien, deen och d’Lëtzebuerger Regierung  zu de legalen Aspekter vu Weltraumaktivitéite beréit.

Kuerz virun 3 Auer mëttes lokal Zäit gëtt eng Live-Schaltung an de Luxembourg Science Centre op Déifferdeng gemaach, wou den Etienne Schneider den offizielle Startschoss fir den Asteroid Day a gläichzäiteg och déi éischt national Science Week gëtt.

De komplette Programm vun den Tables Rondes fannt dir hei (op Englesch)

Wëssenschaftlech Atelier’en, Virliesungen a Visites guidées

Den Asteroid Day zeechent sech awer och virun allem duerch eng sëlleg lokal Evenementer aus, dës Joer a méi wéi 72 Länner op der ganzer Welt.

Zu Lëtzebuerg bedeelegt sech de Musée national d’histoire naturelle (naturmusée) den 30. Juni an 1. Juli mat wëssenschaftlechen Atelier’en, Virliesunge vu Meteoritte-Fuerscher a Visites guidées vu sengen neien Ausstellungen iwwert d’Meteoritte-Kollektioun vum Musée an d’Roll vun Asteroiden a Massenausstierwen an der Vergaangenheet.

De komplette Programm vum Asteroid Day Evenement am naturmusée fannt dir um Internetsite vum Musée.

Am Luxembourg Science Centre bidd den hauseegene Médiateur Scientifique an Astrophysiker Guillaume Trap am Kader vum Asteroid Day wëssenschaftlech Atelier’en fir Schoulklassen un (nëmmen op Invitatioun).

Weider Informatiounen iwwert den Asteroid Day fannt dir op www.asteroidday.org

Wat ass den Ënnerscheed tëscht engem Asteroid, engem Meteorit an engem Meteor? Dat kënnt dir an dësem Artikel op science.lu noliesen

Auteur: Michèle Weber (FNR)
Photo: Asteroid Day

Auch in dieser Rubrik

Totale Mondfinsternis 2018: Was passiert da eigentlich?

26.07.18 Spektakuläres astronomisches Ereignis: Am Abend des 27. Juli 2018 findet die längste Mondfinsternis des 21. Jahrhunderts statt. Aber was genau passiert da e...> Ganzen Artikel lesen

Interview mit einem Astronauten - Unsere wichtigste Aufgabe: Karten des Sonnensystems erstellen

29.06.18 Zum Asteroid Day am 30. Juni kommen drei Astronauten nach Luxemburg. Einer davon ist Dr. Ed Lu aus den USA. sciene.lu spricht mit ihm über Risiken und Chanc...> Ganzen Artikel lesen

Conférence-Formation: Comment accroître la participation des filles dans les disciplines STEM?

01.06.18 Une conférence-formation dédiée aux meilleures pratiques et « Role Models » féminins européens à suivre pour accroître la participation des filles dans les ...> Ganzen Artikel lesen

Quantencomputer: Der Anfang vom Ende der digitalen Ära?

18.05.18 Weltweit arbeiten Wissenschaftler an der Entwicklung von Quantencomputern. Einer davon ist der in Großbritannien forschende Luxemburger Foni Raphaël Lebrun. > Ganzen Artikel lesen

Heart disease: sex-biased healthcare puts women at risk

28.03.18 It is paramount to account for sex differences in healthcare since men and women’s biology and physiology are not equivalent. > Ganzen Artikel lesen

Verwandte Themen