Firwat fanne mer den Tommy Schlesser esou sexy?

10.12.15

FNRDiesen Artikel drucken
Den Tommy Schlesser gouf zum sexyste Lëtzebuerger gewielt. An hie gesäit jo och wierklech net schlecht aus, mee firwat fanne mer grad hien esou sexy?

Déif Stëmm, markéierte Kënn, symmetresch Gesiichtszich,... dat sinn alles Zeeche vu physescher a genetescher Gesondheet. 

Déi gudd Qualitéit wëllen d’Fraen natierlech weider un hir Kanner ginn, an dofir fanne se esou männlech Eegeschaften natierlech sexy! Mee dat heescht nach laang net, dass se och hiert Liewe wéilte mat him verbréngen!

Déi mannste Fraen hätte wuel eppes dergéint fir hiert Liewe mat him ze verbréngen. Oder? 

Dat hängt dovun of, wou eng Fra an hirem biologeschen Zyklus drun ass. Wann se grad en Eesprong huet a kéint schwanger ginn, da flitt se tatsächlech op esou sexy Männer! Well déi staark a gesond sinn, setzen se gudd Viraussetzunge fir gesonden Nowuess. De Rescht vum Zyklus, wann et jo souwisou net drëm geet fir schwanger ze ginn, sinn d’Fraen éischter vu méi sensibelen, heinsdo souguer bësse weiblech ugehauchte Männer ugezunn, well déi a priori besser Partner a Pappe schéngen ze sinn.

Reng biologesch ass dat alles ganz stereotypesch, mee spillt eis Kultur do net och eng Roll?

Vun engem reng biologesche Standpunkt ass et effektiv stereotypesch, well mir do just Déiere si wéi all déi aner! Mee a Wierklechkeet spillt do awer och eis Kultur, eis Gesellschaft, d‘Erzéiung an och eis Spiritualitéit eng grouss Roll. Een attraktiv oder sexy fannen huet jo nach laang näischt mat Léift, Vertrauen oder Charakter ze dinn. Dofir däerf een déi Saach dann och net esou streng gesinn!

Et lauschtert een also am beschten op säi Bauchgefill anstatt seng Bezéiung wëssenschaftlech ënnert d’Lupp ze huelen. Obwuel d'Wëssenschaft vill dozou ze soen huet:

Am Idealfall bilt de Kierper sech bei engem Embryo ganz symmetresch lénks a riets vun der zukënfteger Wirbelsail. D’Resultat ass an deem Fall natierlech e perfekt symmetresche Kierperbau! A ville Fäll ënnerlafen awer kleng genetesch Feeler. Obwuel se net onbedéngt grouss Konsequenzen hunn, kënnen se trotzdem hier Spuren ënner Form vu klengen Onsymmetrien hannerloossen. Dat selwecht gëllt fir Infektioune während der Schwangerschaft, Ënnerernierung, Alkohol, Drogen oder Tubak. Dass mer symmetresch Gesiichter also méi attraktiv fannen, ass eng onbewosst Äntwert op physesch a genetesch Gesondheet.

Bei der Partnerwahl geet et jo awer net nëmmen em d'Ausgesinn. Och z.B. de Kierpergeroch spillt eng Roll. Firwat fanne mer engem anere säi Kierpergeroch a bestemmte Fäll oofstoussend?

Am Volleksmond seet een dack „Ech kann deen net richen!“. Biologesch gesinn ass do eppes drun. Während dem Eesprong, wann eng Fra ka schwanger ginn, emfënnt se de Kierpergeroch vu Familljememberen als ofstoussend. Bei eise gesellschaftleche Verhältnisser ass dat vläit net méi esou wichteg, mee bei eise Virfahren, déi ëmmer a méi oder manner grousse Gruppen zesummegelieft hunn, war et net ëmmer kloer, ween elo zur noer Famill gehéiert a ween net. De Kierpergeroch, dee vill vum Imunsystem beaflosst gëtt, gläicht sech dofir bei Familljememberen. Dass mer deen dann ofstoussend fanne verhënnert Inzucht, an domat genetesch Problemer beim Nowuess.

Och wat Monogamie ubelaangt schénge Wëssenschaft a Kultur net onbedéngt op enger Wellelängt!

Monogamie ass bei eis de gesellschaftleche Standard! Biologesch ass dat awer keng Noutwennegkeet. Et ginn näämlech net vill Déieren, déi e Partner fir d’Liewen hunn, an och bei de Mënsche ginn et do Ënnerscheeder!

D’Frae si permanent tëscht engem Mann, deen interessant Qualitéite fir den Nowuess huet, an engem Mann, dee sech als Liewenspartner an Erzéier fir d‘Kanner (mee net onbedéngt biologesche Papp) eegent, hin an hier gerappt. Statistesch gesinn hunn d‘Fraen och éischter d’Tendenz während hirem Eesprong mat engem sexy, attraktive Mann ze schlofen. Während dem Rescht vum Zyklus sinn se ganz zefridde mat hirem sensibelen, hëllefsbereeten a verständnesvolle Liewenspartner.

D’Männer hunn en ähnleche Problem! Si wëlle jo och der nächster Generatioun hir gudd Qualitéiten hannerloossen! Dofir si si physesch vu Fraen ugezunn, déi se onbewosst als fruchtbar ugesinn. Zum Beispill mat grousse Brëscht (en Zeechen dass d’Fra aus der Pubertéit ass a Kanner ka kréien), markéierten Hëften (en Zeechen dass se robust genuch ass fir d’Gebuerten ouni Problem ze iwwerstoen) an enger schmueler Taille (betount d’Brëscht an d’Hëften optesch). Mee am Alldag sinn och si mat hirem Liewenspartner zefridden, sou wéi en ass.

Auteur: Corinne Kroemmer

Foto ©actors.lu

Auch in dieser Rubrik

Firwat soll ee beim Iessen net iwwer Politik schwätzen?

20.09.17 Enger aler Reegel no soll ee beim Iessen net iwwer Politik schwätzen. Gëtt et dofir e Grond? > Ganzen Artikel lesen

Wann d´Mier voller Plastik ass – land en dann och am Fësch op mengem Teller?

15.02.17 An de Mierer schwammen onmoosseg grouss Quantitéite Plastik ronderëm. Verschidden Mieresdéiere verschlécken dëse Plastik. Kéint en sou och mam Fësch op meng...> Ganzen Artikel lesen

Wat geschitt beim Impfen?

26.10.16 Scho mat e puer Woche kréie Puppelcher hier éischt Impfung – wat geschitt eigentlech dobäi am Kierper? > Ganzen Artikel lesen

D'Wëssenschaft vum Eelefmeter: Mat statisteschen Etuden déi bescht Taktik ermëttelen

04.07.16 De Fussballspiller leeft un, waard kuerz a schéisst...déiw an den Eck! Wier et besser héich ze schéissen? Net ze waarden? Domadder hu sech Wëssenschaftler b...> Ganzen Artikel lesen

Firwat richt ee Parfum no kuerzer Zäit net méi?

11.05.16 Heiansdo froen ech mech, firwat ech iwwerhaapt Parfum benotzen…no puer Minutten ass de Geroch souwisou fort. Verflitt de Parfum sou schnell? > Ganzen Artikel lesen

Infobox

Mister Science op Eldoradio

All 2 Wochen beäntwert de Mister Science op Eldoradio är Froen.
Des Fro gouf den 25/09/13 opgeholl

Scheck och deng Fro op: mister.science_at_fnr.lu
 

Fuerschung iwwert d’Grenzen eraus:

Fuerschung zu Lëtzebuerg:

Linken :

Quellen: