Kann ee Liicht an enger Këscht afänken?

27.04.16

FNRDiesen Artikel drucken
Mr Science, e Nolauschterer huet mer do eng zimlech abstrus Fro gestallt. Ass et méiglech Liicht an enger Këscht afänken?

Haha d’Schildbierger hunn dat mol gemaach. Ech soen der direkt: Dat geet leider net!

Wann eng Këscht op ass, kënnt jo Liicht eran. Wann ech se lo séier zoumaachen, ass d’Liicht jo dobannen!

Liicht, wat an eng Këscht erakënnt, gëtt vun der Këscht opgeholl, absorbéiert.

A wann d’Këscht aus lauter Spigelen besteet?

Och e Spigel ass leider net perfekt. Hien hëlt ëmmer en Deel vun dem Liicht op, spigelt also net alles zréck.

Mä bis en alles opgeholl huet, dat dauert jo. Esou laang ass jo dann Liicht an der Këscht agefaang.

D’Liicht geet jo immens séier virun. An enger Këscht vun engem Meter Längt géif d’Liicht 300 Millioune Mol an enger Sekonn hin an hir gespigelt ginn. All Kéiers ginn ongeféier 5% opgeholl. Do bleift no e puer Kéieren schonn näischt méi Rescht.

Ok. Mä beim haidegen Stand vun der Wëssenschaft misst et dach iergendwéi méiglech sinn, Liicht an enger Këscht ze stockéieren!

Du gleefs et net, mä d’Këscht selwer besteet aus Liicht, dat viru laanger Zäit agefaang ginn ass!

Wisou?

D’Holz, vun der Këscht kënnt jo vun engem Bam hir. An deen huet d’Liicht mat Hëllef vu senge grénge Blieder opgeholl an des Energie am Stamm stockéiert. A wann s de d’Këscht verbrenns, kriss de erëm e bëssi Liicht zréck.

Dat ass ower net dat selwecht Liicht, wéi dat wat de Bam Joer virdrun opgeholl huet.

Richteg. En anert Beispill, wou Liicht awer kuerzzäiteg opgeholl gëtt sinn déi Stären, déi kléng Kanner heiansdo an hirem Zëmmer hänken hunn, an déi nach eng Zäitchen liichten, nodeems d’Luucht schonn aus ass.

Ajo déi späicheren Liicht.

Jo awer si senden et an de nächsten Minutten erëm aus. Dat nennt ee Phosphoreszenz! Mä, „ausgesend“ heescht „d’Liicht ass fort“. D’Liicht léisst jo nu mol net aspären.

Auteur:  André Mousset (Physiker)
Editeur: Joseph Rodesch (FNR)
Photo © Shotshop

Auch in dieser Rubrik

Kann een hannert enger Fënster brong ginn?

07.06.17 Kann ee bei laangen Autosfaarte brong gi – virausgesat d’Sonn schéngt? An kann een hannert enger Fënster souguer en Sonnebrand kréien? > Ganzen Artikel lesen

Looping mam Fliger: Bleift Waasser am Eemer wann de Fliger op der Kopp as?

02.05.17 Eng spektakulär Variatioun vum éischten Experiment, dat de Mr Science als Kand gemaach huet. > Ganzen Artikel lesen

Wann een op eng Gedrénks-Béchs klappt, schaimt se da beim Opmaachen net iwwer?

18.01.17 Hëlleft et wierklech, widder eng Gedrénks-Béchs ze klappe fir dass se net iwwerschaimt, a wann jo, op wat muss een dobäi oppassen? > Ganzen Artikel lesen

Wisou schmaacht alkoholfräie Béier sou anescht?

04.01.17 Vill leit rëselen de Kapp bei alkoholfräiem Béier. Mee en huet ëmmer méi Erfolleg. Mee wisou schmaacht en net genee wei d’Original? > Ganzen Artikel lesen

Wann all d'Gletscheren an d'Polkappen schmëlze giffen - giff da Lëtzebuerg ënner goen?

05.09.16 Mr, Science! De Klimawandel ass voll am Gaang.> Ganzen Artikel lesen

Infobox

Mister Science op Eldoradio

All 2 Wochen beäntwert de Mister Science op Eldoradio är Froen.
Des Fro gouf den 27.04.2016 opgeholl.
Scheck och deng Fro op: mister.science_at_fnr.lu

 

Fuerschung zu Lëtzebuerg


Verwandte Themen