Weem ass et am Summer méi waarm: dem Décken oder dem Dënnen?

21.06.17

FNRDiesen Artikel drucken
Leit déi iwwergewiichteg si, beschwéieren sech am Summer oft méi iwwer d’Hëtzt wéi Leit déi méi schlank sinn. Gëtt et dofir eng wëssenschaftlech Erklärung?

Jo et gi wëssenschaftlech Studien déi erklären, dass Iwwergewiichteger Hëtzt manner gutt verdroe wéi Schlanker, an dat ass haaptsächlech op zwou Saachen zréckzeféieren: eng méi déck Fettschicht an eng méi grouss Kierperuewerfläch.

Elo sinn ech awer gespaant op deng Erklärung

De Mënsch muss seng Kierpertemperatur konstant halen. Wäermt gëtt am Kierper duerch chemesch Reaktiounen produzéiert, z.B. bei der Verdauung. De Kierper muss déi Wäermt vu bannen awer erëm no baussen ofginn, soss géif d'Kierpertemperatur permanent klammen. De Kierper leed d’Wäermt also Richtung Haut.

An dobäi hëlleft Fett net....

Genee. Fettgewebe funktionéiert e bëssen wéi eng Isolatiounsschicht vun engem Haus: den Expert géif vu Wärmedämmung schwätzen. Wat déi Fettschicht méi déck ass, wat d’Wäermt manner gutt vu bannen aus dem Kierper un d’Uewerfläch vun der Haut fléisst.

Schweessen ass jo och eng Méiglechkeet wéi de Kierper Wäermt lass gëtt, duerch Verdonstung vu Waasser un der Kierperuewerfläch. Bei enger iwwergewiichteger Persoun ass jo d’Kierperuewerfläch méi grouss, d.h. déi hu méi „Platz“ fir ze schweessen? Kompenséiert dat dann net?

Bei normalen Temperaturen jo, mee wann et waarm ass hëlt déi méi grouss Kierperuewerfläch och méi Wäermt vu baussen op, déi dann an där méi grousser Gesamtmass vum Kierper stockéiert gëtt. A wéi mer gesinn hunn, bei sou Leit net sou gutt no baussen geleet gëtt.

Sou ganz pauschal kann een dat awer net gesinn. Et sinn och nach aner Facteuren déi kënnen en Afloss drop hunn wéi gutt een Hëtzt verdréit, z.B. de Bluttkreeslaf oder Hormonproduktioun.

Wann ech elo richteg kombinéieren: Glace iessen hëlleft nëmme kuerzfristeg fir sech ofzekillen, emol d’Kalorien op de Rëpper hält se eis waarm.

Genau!

Aner interessant Froën hondrëm des Thema:

Wéi ee mat extremer Hëtzt emgeet 

Firwat ass et de Fraen ëmmer méi kal wéi Männer?

Auteur: Michèle Weber (FNR)
Editeur: Joseph Rodesch (FNR)
Photo: Film screenshot - "The Flying Deuces", Public Domain, https://commons.wikimedia.org/w/index.php?curid=6285491

Auch in dieser Rubrik

Ginn et Déieren, déi net schlofe mussen?

26.03.18 Mr Science, dëse Weekend war ech esou groggi – ech hu bal nëmme geschlof. Iergendwéi ass dat jo och Zäitverschwendung.> Ganzen Artikel lesen

Gefillten Temperaturen: Wisou et dobaussen heiansdo méi kal schéngt, wéi et ass

28.02.18 D'Wiederprevisiounë ginn net nëmmen déi Temperaturen un, déi den Thermometer den Dag drop moosse wäert, mee dacks och déi gefillten Temperatur. Wat ass dat? > Ganzen Artikel lesen

Zerstéiert Alkohol wierklech Gehirzellen?

12.02.18 E puer iwwert den Duuscht gedronk, an den Dag drop kaum nach Erënnerungen...heescht dat, datt vill Gehierzelle futti gaang sinn? > Ganzen Artikel lesen

Kënnen och Mënschen e Wanterschlof halen?

01.02.18 Kéisécker maachen et, Fliedermais och a Siweschléifer souwisou: Et gëtt vill Mamendéieren, déi e Wanterschlof halen. Wisou net och mir Mënschen? > Ganzen Artikel lesen

Wisou leeft engem d’Waasser am Mond zesummen, wann een eppes Leckeres gesäit?

21.11.17 D’Aen iesse mat, heescht et: Schonns beim Ubléck vun appetitlechem Iesse leeft eis d’Waasser am Mond zesummen. Firwat? > Ganzen Artikel lesen

Infobox

Quellen

Cramer MN, Jay O. Biophysical aspects of human thermoregulation during heat stress. Autonomic Neuroscience: Basic and Clinical 196 (2016) 3–13
Anderson GS. Human morphology and temperature regulation. Int J Biometeorol (1999) 43:99–109