Stressmoossungen: Wéi vill kann ee Schüler stressen?

05.03.17

FNR
ZithaGesondheetszentrum
Diesen Artikel drucken

Ass e méiglech fir Schüler an enger Schoulstonn opde selwechte Stressniveau zekréie wéi e Fallschiermsprénger virun engem Sprong? Dat wollt de Mr Science testen.

A sengem Experiment moosst hien de Stress vu Schüler vun enger 4e aus dem Lycée Aline Mayrisch virun enger fiktiver Aufgab, a vergläicht hire Stressniveau mat deem vu Fallschiermsprénger virum Sprong. D'Schüler krute gesot, datt ee vun hinnen, dee per Zoufall gezu gëtt, muss virun der Klass, op en onbekannte Lidd, eppes virdanzen. Allerdéngs huet kee wierklech misse virdanzen, mee dat sinn d’Schüler eréischt duerno gewuer ginn.

Stress declenchéiert gläichzäiteg e puer Reaktiounen am Kierper, déi ee moosse kann: De Stresshormon Cortisol fënnt een am Blutt oder Spaut erëm, de Bols geet erop, an d’Handfläche gi schweesseg. Dës Parameter ginn direkt vum Angschtzentrum am Gehir, der Amygdala gesteiert.

Fallschiermsprénger hu virum Sprong en erhéichte Stressniveau an dat gouf unhand vum Stresshormon Cortisol gemooss. An der Klass hu mer de Bols an de Schweess op den Handfläche gemooss, an eist Experiment huet gewisen, datt eise Kierper och am Virfeld vu Situatioune reagéiert, déi zwar vläit stresseg awer guer net geféierlech sinn. De Kierper reagéiert virun all Stresssituatioun d‘selwecht, mol méi mol manner staark.

Vue datt eis Miesmethod eng aner wéi déi bei de Fallschiermsprénger an der Literatur war, a well d‘Testpersounen net déi selwecht waren an deenen zwee Fäll, sinn eis Moossungen natierlech net direkt vergläichbar. Et kann een also d’Fro net beäntwerte wien sech méi gestresst huet. A béide Fäll declenchéiert den Angschtzentrum am Gehir awer de selwechte System vun der Alarmbereetschaft am Kierper.

Stresspräventioun

Den Dr Gilles Michaux, Psychobiolog a Psychotherapeut am ZithaGesondheetsZentrum huet eis fir dës Sendung beroden. Stressübungen, wéi déi, déi mir an der Klass gemaach hunn, ginn an der Stresspräventioun a souguer an der Suchtpräventioun agesat, fir iwwer Stress ze schwätzen, an en esou besser ze verstoen an ze kontrolléieren. Heefege Stress deen een net ofgebaut kritt ass ee Facteur deen zu Burnout a souguer och zu Suchtverhale féiere kann.

Wéi kann een säin eegenen Stress moossen?

Bei de Schüler hu mir virun allem d‘Hautleitfäegkeet mat Hëllef vun einfachen Elektrode gemooss déi un engem Tablett ugeschloss waren. Domat kann ee relativ prezis gesi wéi vill een ënnerlech ugespaant ass. Dëse System ass och immens reaktiv. Dës Elektroden (eSense) ginn et am Handel a kenne geholl ginn, wann een sech selwer wëll Biofeedback ginn, d.h. wann ee wëll léiere säi Stressniveau kontrolléieren.

1Adrenocortical responses to repeated parachute jumping and subsequent h-CRH challenge in inexperienced healthy subjects.

R. DEINZER,*1 C. KIRSCHBAUM,† C. GRESELE‡ AND D. H. HELLHAMMER†

Auteur: Joseph Rodesch (FNR)
Produktioun: RTL

Auch in dieser Rubrik

Mann vs Fra: Wien schwätzt méi laang, wien ënnerbrécht méi dacks?

03.04.17 De Mr Science ënnersicht "Manterrupting" an ëffentlechen Debaten. > Ganzen Artikel lesen

Wéi kann ee virum Gestank vum eegene Fascht fortlafen?

17.11.16 Wann een ee während dem Goe fascht, dann ass et wéi wann de Gestank engem géif nolafen. Firwat ass dat sou? A matt wéi enger Method kënnt een awer fort? > Ganzen Artikel lesen

Pedelec géint Auto – Eng Course am Beruffstrafic

30.10.16 Den Auto steet am Stau an um Vëlo kënnt een an de Schweess. Den ëffentlechen Transport ass villen ze onflexibel a lues. Mee gëtt et eng gudd Alternativ? > Ganzen Artikel lesen

Wéi verhält een am beschten? Tippen, schreiwen oder just nolauschteren

06.06.16 Handschrëftlech Notize sollen dem Gehir hëllefe beim verhalen. Mee ass dat wierklech sou? De Mr Science huet dat mat 2e Schüler getest. > Ganzen Artikel lesen

Krankheeten duerch Viren: Wéi iwwerdréit sech e Virus?

29.02.16 Viren iwwerdroen sech ënner anerem iwwert eis Hänn. Wéi séier mir eis Viren doruechter verspreeën kënnen weist de Mr Science matt engem erstaunlechen Experi...> Ganzen Artikel lesen

Infobox

RTL PISA - de Wëssensmagazin

Dëse Reportage gouf fir d'Emissioun Pisa Wëssensmagazin vum 05/03/17 produzéiert. D'Sendung kënnt emol de Mount Sonndes ab 18.30 op RTL Telé Lëtzebuerg.

Déi ganz Sendung fannt dir op pisa.rtl.lu