(c) NASA
10/7/1910: De Johann Galle stierft. Den däitschen Astronom war a senger Jugend fir d’spektakulär Entdeckung vum Planéit Neptun bekannt ginn.
En Aarbechtskolleg hat dem Johann Galle d’Coordonnéeë vun enger Plaz am Himmel ginn, wou en neie Planéit sech misst befannen. Sou konnt de Galle säin Teleskop genee positionéieren an tatsächlech als alleréischte riicht op en neie Planéit kucken: den Neptun.
Wéi wousst deen da wou genee den Neptun wier?
Hien hat et ausgerechent! All Planéit vun eisem Sonnesystem beweegt sech jo op engem Orbit rondrëm d’Sonn. Bei engem Planéit, beim Uranus, sinn awer kleng Ongereimtheeten an den Date vu sengem Orbit festgestallt ginn, déi sech net duerch d’Unzéiungskraaft vun der Sonn erkläre gelooss hunn.
Haten se sech da verrechent?
Dat hätt kënne sinn. Mee an dësem Fall léist des kleng Ofwäichung sech doduerch erklären, dass eng aner Mass, en aner Planéit, op den Uranus awierkt an duerch seng Unzéiungskraaft säin Orbit liicht verännert. Wéi se dësem neie Planéit Neptun seng Positioun bis ausgerechent haten, konnt de Galle en ganz geziilt am Himmel identifizéieren.
Auteur: Corinne Kroemmer
Editeur: André Mousset
Foto © NASA
Infobox
1mol d'Woch présentéiert de Mr Science op RTL Radio d'Erfindung oder den Entdecker vum Daag.
