FNR
De Joseph vu science.lu (Mister Science) stellt Dir haut en Challenge.
De Joseph vu science.lu weist Dir am Experiment vum Dag en Challenge, deens de denge Geschwester oder Eltere kanns weider ginn. Probéier en Nol mat enger Gromper drop op dengem Fanger ze balancéieren. Zu Hëllef kanns de 3 Forschetten huelen.
Dat geet wann een d’Forschette méiglecht wäit ënnen an d’Gromper pickt. Doduerch verlagert sech de Schwéierpunkt vun deem ganze System no ënnen, ënnert de Fanger, an doduerch bleift de Nol mat der Gromper stabil um Fanger stoen.
Wärend der ganzer Zäit vum COVID-19 Homeschooling verfilme mir vu science.lu all Dag ee klengt Experiment fir dech, wat ee mat wéineg Material doheem nomaache kann. Eis Zieler: dech virwëtzeg maachen, dech un d’staunen kréien an dir d‘Freed um experimentéiere weider ginn.
Kuck net just de Video mee maach d‘Experiment no!
Dat mécht vill méi Spaass an dobäi mécht een dacks nach aner intressant Beobachtungen. Also sich d’Material an da lass!
Heiansdo klappt et net bei der éischte Kéier – dat ass normal – kuck de Video nach emol genee oder sich am Internet no enger anerer Beschreiwung vum Experiment.
Vill Spaass beim nomaachen!
