D’Linda vu science.lu weist Dir am Experiment vum Dag, wéi Flëssegkeeten, déi a Glieser nieftenee stinn, géint d’Schwéierkraaft wandere kënnen an sech sou matenee vermëschen ouni datt en eppes manipuléiert. Heivir ginn d’Kapillarkräfte vu Kichepabeier genotzt. De Kichepabeier saugt sech mat Waasser voll, well d'Waasser un an tëscht de Pabeierfaseren eropwandere kann. Am eidele Glas tëscht 2 Glieser mat Faarwen treffen d’Flëssegkeeten am Pabeier openeen. Hei gëtt de Pabeier mat Waasser iwwersättegt, wat dozou féiert datt elo d’Mëschung vun de Faarwe rëm erausdrëpst. Intressant sinn natierlech och déi nei Faarwen déi duerch Additioun vun 2 verschidde Faarwen entstinn.
Wärend der ganzer Zäit vum COVID-19 Homeschooling verfilme mir vu science.lu all Dag ee klengt Experiment fir Dech, wat ee mat wéineg Material doheem nomaache kann. Eis Zieler: Dech virwëtzeg maachen, Dech un d’staunen kréien an Dir d‘Freed um experimentéiere weider ginn.
Kuck net just de Video mee maach d‘Experiment no!
Dat mécht vill méi Spaass an dobäi mécht een dacks nach aner intressant Beobachtungen. Also sich d’Material an da lass!
Heiansdo klappt et net bei der éischte Kéier – dat ass normal – kuck de Video nach emol genee oder sich am Internet no enger anerer Beschreiwung vum Experiment.
Vill Spaass beim nomaachen!
