1ten September 1985: no 73 Joer gëtt de Schëffwrack vun der Titanic endlech fonnt!
Et war d’Symbol vun der industrieller Revolutioun, vu Luxus a vu Fortschrëtt ! Mee et hätt net solle sinn : d’Titanic ass op senger éischter Iwwerfahrt ënner gaang. Mee eréischt nodeems se de Schëffwrack viru 26 Joer erëmfonnt hunn, wësse mer firwat dat Schëff sou séier konnt ënnergoen!
An d’Geheimnis läit an der Metallurgie ! Analyse vum Stol weisen, dass e bei kalen Temperature bréckelt an doduerch liicht Rëss entstinn. Weider Analysen hunn dunn un d’Liicht bruecht dass de Stol en héijen Undeel u Phosphor a Schwiefel huet, an nëmme ganz wéineg Mangan enthält: duerch de Phosphor entsti séier Rëss, duerch de Schwiefel lafen dës Rëss séier weider an duerch de Mangel u Mangan ass de Stol ongeschmeideg.
D’Titanic war also bësse wéi eng Eeërschuel? Wann een et op enger Plaz untéckt huet een e Rass bis op déi aner Säit?
Sou ongeféier. Mee an der Tëschenzäit huet d’Metallurgie awer grouss Fortschrëtter gemaach! All déi Zesummesetzungen an hier Eegeschafte si kee Geheimnis méi a mir kenne verschidde Stoollegéirunge produzéieren déi perfekt un hire Gebrauch ugepasst sinn.
Text: Corinne Kroemmer
Infobox
1mol d'Woch présentéiert de Mister Science op RTL Radio d'Erfindung oder den Entdecker vum Daag.
