shotshop.com
Dacks mengt een, et kéint ee Reen scho richen, éier en do ass. Mr Science, kann dat wierklech sinn, oder ass dat just Abildung?
Nee dat ass keng Abildung! Dee Ree selwer kann een zwar net richen, awer Substanzen, déi duerch de Reen fräi gesat ginn. Dat sinn zum Beispill Substanze wéi ätheresch Ueleger op de Blieder vu Planzen, déi vum Reen ofgewäsch ginn oder Zersetzungsprodukter vu Bakterien.
Wa Reendrëpsen op Blieder oder op de Buedem treffen, wierbelen si mini kleng Drëpsen an d‘Luucht, déi des Substanzen maträissen. Des mikroskopesch Drëpse bilden e sougenannten Aerosol, also ee feinen Niwwel, deen de Wand weider dréit. Sou kann et sinn, datt mir Reen richen deen op eis duer kënnt, well mir duerch dee Geroch virgewarnt ginn.
Wat sinn dat fir Zersetzungsprodukter vu Bakterien, déi mir riche wann et reent?
Eent ass besonnesch gutt erfuerscht, de Geosmin. Et gëtt vu Bakterien, Schimmelpilzer an anere Mikroorganisme produzéiert, wa si organescht Material wéi zum Beispill Planzereschter zersetzen. Geosmin richt no Buedem an e bësse muffeg, an dat ass ee Geroch op deen eis Nues extrem empfindlech reagéiert.
Also ech hunn de Geroch vu Ree gär!
Do bass du net deen eenzegen. Parfumsentwéckler probéieren ëmmer erëm, dee Geroch nozemaachen. Si huelen dofir als ee vun den Ingredienten de Jus vu roude Rommele, well do ass vill Geosmin dran. Dofir schmaachen déi och e bëssen no Buedem.
Bei anere Geleeënheeten ass dee Geroch net sou erwënscht: Fësch richen oft dono, virun allem Frellen a Kaarpen. Well Geosmin awer a Presenz vun enger Saier zerfält, mëscht een e gär mat e bëssen Zitrounejus oder Esseg. Sou kann een de Geroch vu Buedem reduzéieren.
Problematesche Geosmin-Geroch
Sou gär wéi mer e Fréijoersreen richen, dee staark no Geosmin richt, sou onerwënscht ass dëse Geroch vu muffegem Buedem a Liewensmëttel, Waasser, Wäin oder Jus, well de Consommateur da mengt déi wäre verduerwen. Dofir probéiere Fuerscher genau ze verstoen, wéi eng Mikroorganismen ënner wéi enge Konditioune Geosmin produzéieren a wéi een dat vermeide kann. D’Erfuerschung vum „Reegeroch“ huet also erstaunlech grouss wirtschaftlech Relevanz!
Auteur: Ingo Knopf / scienceRELATIONS
Éditeur an Iwwersetzer: Michele Weber (FNR)
Infobox
- Nature of argillaceous odour
Bear et al., Nature 1964
https://www.nature.com/articles/201993a0 - Aerosol generation by raindrop impact on soil
Young Soo Joung et al., Nature communications 2015
https://www.nature.com/articles/ncomms7083
All 2 Wochen beäntwert de Mr Science op Eldoradio eng Fro.
