(c) US DOT symbols
De 26. Juni 1886 huet de franséische Chemiker Henri Moissan et endlech fäerdeg bruecht, d’chemescht Element “Fluor” ze isoléieren! Eng grouss Entdeckung un där méi wéi ee gescheitert ass.
Wéi dann dat?
D’Aarbecht vun de Chemiker war deemools immens geféierlech. Si hunn nämlech dacks mat neie Chemikalie geschafft vun deenen se absolut näischt woussten. Sou wéi zum Beispill mat Fluor, e giel-grénge Gas, deen extrem reaktiv ass: Fluor explodéiert wann e mat Waasser a Kontakt kënnt an zerstéiert beim Anootmen d’Schläimhaut. Eng ganz Rei Chemiker, déi probéiert hu Fluor ze isoléieren, hunn hir Aarbecht entweder mat hirer Gesondheet oder souguer mat hirem Liewe bezuelt: si ginn haut nach als “Fluor Märtyrer” bezeechent. Den Henri Moissan huet seng Aarbecht awer iwwerlieft an ass 20 Joer méi spéit mam Nobel Präis fir seng Entdeckung belount ginn.
Ma wéi dann, Fluor kann dach net esou geféierlech sinn? Se maachen es dach an d’Zahnpasta!
Fluor Gas ass extrem geféierlech. An an der Zahnpasta ass glécklecherweis kee renge Fluor dran, mee eng Fluorverbindung, an zwar Fluorid Salz. Op der Verpackung gëtt dat leider als Fluor ofgekierzt, wat falsch ass, well renge Fluor chemesch gesinn näischt mat enger Fluorverbindung ze dinn huet.
Auteur: Corinne Kroemmer
Editeur: Joseph Rodesch a Jerry Wagener
Foto © US DOT symbols
Infobox
1mol d'Woch présentéiert de Mr Science op RTL Radio d'Erfindung oder den Entdecker vum Daag.
