Alt erëm eng vun deenen Zoufallsentdeckungen. Eigentlech war den LSD, e potentiellt Medikament, schonn zënter 5 Joer am Tirang verschwonn wëll et keng richteg Wierkung hat.
Ma beemol hat de Chemiker Albert Hofmann awer sou e Gefill am Bauch wéi wann LSD dach fir eppes gutt wier. Bei sengen Experimenter huet en - ouni et ze mierken - e bëssen LSD opgeholl an dono dee schéinsten Tripp vu sengem Liewe gemaach. Fir sécher ze sinn dass et och vum LSD wier an dass en net amgaang wier de Verstand ze verléieren, huet en dunn mol direkt nach eng Kéier probéiert, an zwar mat enger Dosis déi hautesdaags schonn als zimlech riskant ugesinn ass. Während 6 Stonnen hat en Halluzinatiounen an huet gemengt e wier an enger aner Realitéit geland.
1943! Wow, also schonn zimlech laang ier d’Hippien opgetaucht sinn!
Jo, et waren zwar d’Hippien déi den LSD an de 60er Jore bekannt gemaach hunn, mee en ass awer och schonn do virdru benotzt ginn, zum Beispill an der Psychotherapie, mee natierlech och als pure Pleséier. Wéi bis eng Réi Leit schlecht Trippe gemaach hunn, ass den LSD verbuede ginn.
An den Här Hofmann selwer?
Deen ass eréischt 2008 am Alter vun 102 Joer gestuerwen. Also net un enger Iwwerdosis.
Text: Corinne Kroemmer
Infobox
1mol d'Woch présentéiert de Mister Science op RTL Radio d'Erfindung oder den Entdecker vum Daag.
