D’Iddi klengt fantastesch, mee munch Experten halen et prinzipiell fir méiglech: Mat engem Seel amplaz vun enger Rakéit an de Weltraum kommen. Wéi ee Seel bräischt een dofir?

Pixabay

D’Iddi wär e Seel vu 35.000 km vun engem geostationären Satellit erof ze loossen.

Mr. Science, wéi soll dat funktionéieren?

D’Weltraum-Visionäre stellen sech vir, en Seel vun engem Satellit op d’Äerd erof ze loossen. Dat misst vun engem geostationäre Satellit aus geschéien, also een, deen ëmmer op der selwechter Platz iwwer der Äerd steet. Un dësem Seel kéint dann en Lift erof an erop fueren, wat vill manner Energie kaschte géing, wéi d’Rakéiten am Moment. Et gëtt awer dobäi ee Problem. An deen ass iwwer 35.000 Kilometer laang: d’Seel.

Klengt alles zimlech fantastesch!

Éierlech gesot: Jo. Mee wann ee mol an d’Geschicht zeréck kuckt, kéint et jo villäicht dach iergendwann funktionéieren. Fiedem a Seeler begleeden d’Mënschheet scho säit der Steenzäit a goufen iwwer Joerdausende laang aus Naturfaseren hiergestallt.

An der éischter Halschent vum 19. Joerhonnert hunn Ingenieuren d’Stolseel erfonnt: Et gouf aus laangen Dréit gedréint. Deemools war dat wierklech déi top Technologie, wann een dat mol esou soen duerf. An mir staune jo zum Beispill ëmmer nach iwwer Brécke wéi d’Golden Gate Bridge. Déi hänkt jo un zwee parallellen Drotseeler. All Seel besteet aus iwwer 27.000 eenzelen Dréit!

Beandrockend!

Jo, fannen ech och. D’Kabele sinn esou schwéier, si weien iwwer 12.000 Tonnen, dass se op der Platz produzéiert hu musse ginn.

Kéint een dann sou en Seel fir de Weltraumlift benotzen?

Dat wier leider esou schwéier, dass et no ronn 20km duerch säin eege Gewiicht ofräisse géing. D’Visionäre setzen also op ganz nei Seelmaterialien.

Wat kéim dofir a Fro?

Bio-Ingenieure kënne mëttlerweil kënstlech Spannefiedem mat Hëllef vu gentechnesch manipuléierte Bakterien hierstellen, déi 25mol sou stabil si wéi Stol. Mee fir en Weltraumlift geet et nach ëmmer net duer. Do setzen d’Visionären op Seeler aus Kuelestoff-Materialie wéi Graphen déi nach méi liicht a räissfest sinn. Dëst Material ass awer nach am Fuerschungsstadium.

Also gutt, alles huet mol kleng ugefaangen!

Genee, dofir bleift Fuerschung och ëmmer spannend!

Auteur: Ingo Knopf/scienceRELATIONS
Editeur: Joseph Rodesch
Traducteur: Sophie Steinmetz
Photo: Pixabay

Infobox

Mr Science op RTL Radio

Dëse Reportage gouf an Zesummenaarbecht mat RTL Radio ausgeschafft an op der Antenne vun RTL Radio diffuséiert. All zweet Woch présentéiert de Mr Science op RTL Radio wat fir eng Fuerschung hannert Objeten aus dem Alldag stécht. All d'Emissioune fënns du hei: https://www.rtl.lu/radio/science

Aussi intéréssant

night sky with shooting stars

Découvrir
Perséides 2023 Pic de la pluie des étoiles filantes de l’été

Chaque année, les perséides peuvent être observées entre mi-juillet et fin août. Cette année, le pic des étoiles filante...

FNR

Événements
SnT Partnership Day Une interface éprouvée entre la recherche et l’application

Le SnT de l’Université fait désormais partie des centres de recherche les plus importants au monde en matière de dévelop...

SnT

Recherche au Luxembourg
Ultra-légères et extrêmement résistantes Mise au point et essais de nouvelles structures pour les composants aéronautiques et aérospatiaux

Plus un produit est lourd dans l’espace, plus son transport est coûteux. C’est précisément sur ce problème que se penche...

LIST

Aussi dans cette rubrique

 Emotional Tréinen Firwat kräische mer vu Freed oder Trauregkeet?

Bei staarken Emotioune schéissen eis dacks Tréinen an d’Aen. Mee wéi een Zweck huet dat?

FNR
Schlofmangel Firwat kréie verschidde Leit donkel Reefer ënnert d’Aen?

D’Nuecht war kuerz, an da leien d’Ae Moies an donkelen Hielen. Wou kommen dës Aereefer hier? A wat kann een dogéint maachen?

FNR
Mondhygiène Firwat kritt ee Mondgeroch?

Moies virum Zännwäschen oder no enger gudder Ënnenzopp kee Kuss. Mondgeroch, oder Halitosis, ka bei ville Leit virkommen, mee wéi kënnt et dann iwwerhaapt dozou, dass een aus dem Mond ka sténken?

FNR