Wierken Deoe wierklech géint Schweessgeroch?

Mr. Science, et gëtt sou lues méi waarm, an do schweesst e jo och erëm méi. Hëllefen Deoen do tatsächlech?

Jo. Deoen hëllefen – allerdéngs net géint d’Schweesse selwer. Si wierke, wann de Schweess schonn do ass a verhënnere méi oder manner gutt, datt op der Haut en desagreabele Geroch entsteet.

Wéi entsteet Schweessgeroch eigentlech?

Frësche Schweess richt fir d’éischt kaum. Den typeschen Schweessgeroch veruersaache Bakterien op der Haut an der Achsel. Si baue bestëmmte Stoffer of, déi d’Schweessdrüsen an der Achsel produzéieren – virun allem fett- an eewäishalteg Substanzen. Dobäi entsti kleng, flüchteg Moleküllen, déi mir dann als Schweessgeroch wouerhuelen.

Firwat richt een da virun allem ënnert den Äerm?

Well do besonnesch gutt Konditioune fir déi Bakterien herrschen, déi fir de Geroch responsabel sinn: Et ass waarm, fiicht an natierlecherweis sinn do vill Hoer. Ausserdeem enthält de Schweess aus den Drüsen an der Achsel besonnesch vill Stoffer, aus deene spéider Schweessgeroch entstoe kann.

Wéi wierken Deoen da genee?

Vill Deoe kombinéiere verschidde Wirkungsmanéieren: Op där enger Säit blockéieren si de Wuesstem vu Bakterien. Op där anerer Säit iwwerdecken si Geréch mat Parfum. A verschidde Produite veränneren och nach de Milieu vun der Haut esou, datt sech déi Bakterien, déi Geréch bilde méi schlecht vermeeren a manner Gerochsstoffer bilden.

Wat ass den Ënnerscheed tëscht engem Deo an engem Anti-Transpirant?

Antitranspirante wierken anescht wéi Deoen. Si sollen d’Schweesse selwer reduzéieren. Dat funktionéiert op zwee Weeër: op där enger Säit zéien sech d’Hautporen zesummen, aus deenen de Schweess austrëtt. Op där anerer Säit bilt sech e gelartegen Aluminium-Protein-Komplex, deen d’Ausgäng vun de Schweesskanäl temporär blockéiert.

Laang gouf diskutéiert, ob Antitranspiranten mat Aluminiumsalzer e Gesondheetsrisiko duerstelle kéinten. No aktueller Aschätzung vum Bundesinstituts für Risikobewertung (BfR)  an Däitschland gëtt awer däitlech manner Aluminium iwwert d’Haut opgeholl wéi ee laang ugeholl huet. De Bäitrag vun Antitranspiranten zur Total vum Aluminium, deen e Mënsch ophellt, ass dohier ganz kleng.

Och eng Zesummenhang mat Broschtkriibs, dee laang Zäit méiglech geschéngt huet, ass wëssenschaftlech bis elo net bewisen. De BfR schreift, datt d’Datelag zwar net an alle Punkten eenheetlech wier, mee datt Broschtkriibs duerch de Gebrauch vun Antitranspirante mat Aluminium nom haitegen Kenntnisstand awer onwarscheinlech wier.

Muss eigentlech jiddereen en Deo benotze, fir net desagreabel ze richen?

Nee. Net all Mënschen entwéckelen e gläich staarke Schweessgeroch. Ostasiate brauchen z. B. méi seelen en Deo wéi Europäer. Dat hänkt mat de Genen zesummen. Eng Variant vum sougenannten ABCC11-Gen steet en Lien mat däitlech manner Achselgeroch. Si kënnt an der Bevëlkerung vun Ostasie méi heefeg vir wéi an anere Regiounen. Dofir benotzen do vill Leit däitlech manner Deo – oder guer keen.

Wat bewierkt des Genvariant?

Leit mat dëser Variant produzéieren däitlech manner Achselsekret, deen desagreabel Geréch verursaacht. D‘Bakterien op der Haut hunn also manner Stoffer,déi si zu gerochsintensiven Ofbauprodukter ëmwandele kënnen. Manner Fudder fir d’Bakterie bedeit manner Schweessgeroch.

Eng Etüd dozou huet awer nach eng iwwerraschend Diskrepanz fonnt: ongeféier dräi Véirel vun de Participante mat der „gerochsneutraler“ Genvariant hunn trotzdeem all Dag Deo benotzt – obwuel se eigentlech kee bräichten. Dat deit drop hin, datt verschidde Leit Deo éischter opgrond vu sozialen Normen oder aus Gewunnecht benotze wéi datt si es tatsächlech bräichten.  

Ass Schweessgeroch da schlussendlech just eng Fro vun de Genen?

Nee, sou einfach ass et net. Gene spillen zwar eng wichteg Roll. Awer nieft Alter an Hormoner hunn och Bakterien op der Haut an d’Conditiounen ënnert den Äerm en Afloss drop, wéi staark Geroch entsteet. Dëst Zesummespill  probéiert d’Fuerschung besser ze verstoen. Et bleift also spannend an der Fuerschung!

Auteur: scienceRELATIONS/Hannes Schlender
Redaktioun : Michèle Weber (FNR)