© shotshop.com
Ëmmer méi Mënsche schwieren op d‘Intervallfaaschten: Si iessen nëmmen an engem Zäitfënster vun aacht Stonnen, da maachen si 16 Stonne laang Paus. Dat heescht: Entweder fält bei hinnen de Kaffi oder d'Owesiessen aus. Klengt onbequem, mee tatsächlech schwätzen e puer Argumenter dofir, mengt de Mr.Science.
Mr.Science, dës läscht wollt ech ee Kolleeg fir d'Iessen alueden, awer hie mécht Intervallfaaschten a verzicht elo op d'Owesiessen. Ass dat gesond?
Jo, warscheinlech schonn. Méi genee huet een dat awer bis elo just u Mais getest. Mais déi permanent iessen, kréien Diabetis, schlecht Liewerwäerter a gi méi séier al. Wa se awer nëmmen an engem bestëmmten Zäitfënster iessen, bleiwen se gesond- an dat, obwuel se an där Zäit souvill iesse kënne wéi se wëllen.
Cool. Fonctionéiert dat dann och bei Mënschen?
Et kann een dat unhuelen, well Mais en änleche Metabolismus hu wéi d’Mënschen. Éischt kleng Studie weisen och bei Mënschen eng positiv Wierkung. Den Zockerspigel am Blutt normaliséiert sech, Entzündunge ginn zeréck, Liewerwäerter verbesseren sech. A Mënschen déi e bëssi ofhuele wëllen, fannen Intervalfaaschten dacks méi einfach wei ee Regimm. Well eigentlech ginn et keng Saachen di verbuede sinn - et muss ee sech just un d’Pausen halen.
Firwat ka sech faaschten sou positiv auswierken?
Eise Kierper ass optimal dorobber virbereet. An der Steenzäit an an de Joerdausenden duerno ware sou Pause ganz normal. Villäicht brauch de Kierper sou Pause souguer. Studien u Mais hu gewisen datt sech d’Daarmflora duerch déi méi laang Pause verbessert, an eng gesond Daarmflora ass ganz entscheedend fir eis Gesondheet.
Ech mengen dat probéieren ech och emol. Wat muss ech maachen?
Net vill. Du muss dech just un deng Pause mam Iesse vu 16 Stonnen halen. Ech probéieren dat och grad, an et ass schonn eng Ëmstellung, mee et fillt sech awer bis elo mol gutt un.
Ofhuele mat Intervallfaaschten?
Beim Faaschten an Intervallen ziele keng Kalorië mee nëmmen d’Stonnen. Giess gëtt an engem Zäitfënster vun aacht Stonnen am Dag, da gi 16 Stonne Paus gemaach. Vill Mënschen huelen doduerch ouni grouss Ustrengung e puer Kiloen of. Dofir soll ee sech am erlaabten Zäitfënster gesond ernären - a sech net nëmme mat Fast Food voll stoppen. Et dauert e puer Wochen, bis een sech un dëse Rhythmus gewinnt huet. Verschidde Mënsche leen op Dauer och nëmmen zwee Deeg eng länger Paus mam Iessen an.
Wat bewierkt Intervallfaaschten am Kierper?
Bei engem Regimm stellt sech de Kierper mat der Zäit op manner Kalorien an. Soubal de Regimm eriwwer ass, hëlt ee séier erëm bäi, dat ass deen onbeléifte Jojo-Effet. Beim Intervallfaaschte kritt eise Kierper awer genuch Iessen, just net déi ganzen Zäit. Des laang Paus kierpt d’Fettverbrennung un, senkt de Bluttzockerspigel a verbessert mat der Zäit och eis Liewerwäerter. Dat deet bal jidderengem gutt - nëmme Kanner, schwanger Fraen oder Mammen déi hir Kanner niere sollten net faaschten. An wien un Diabetis oder ënner anere gesondheetleche Problemer leit soll virdru bei een Dokter goen.
Auteur: science RELATIONS
Editeur: Joseph Rodesch (FNR)
Iwwersetzer: Joseph Rodesch (FNR), Bidinger Jan
Foto: shotshop.com
Infobox
All 2 Wochen beäntwert de Mr Science op Eldoradio eng Fro. Des Fro gouf an der Sendung vum 19.12.2018 beäntwert.
