shotshop.com

Riicht aus fueren ass eigentlech e permanent Falen oder Zickzackfueren.

Um Vëlo d'Gläichgewiicht ze halen ass einfach - zumindest wann ee fiert. E Nolauschterer huet eis gefrot: Firwat een um Vëlo am Stand ëmfält mee während dem Fueren net…

Während dem Fueren ass de Vëlo eigentlech de ganzen Zäit am gaang, ze falen, no der enger an dann no der anerer Säit. Ower all Kéier riicht een sech erëm op andeems een dat ausgläicht. Et mécht een dat onbewosst an aus dem Gefill eraus. Net vill mä genau dat Richtegt, fir net ëmzefalen.

OK? Riicht aus fueren ass also e permanent Falen oder Zickzackfueren. Mee wisou fale mer do net ëm?

Majo am Fueren do spillt d’Inertie. Dat ass eng Eegeschaft déi all Kierper, deen a Bewegung ass, huet. Wann een a Bewegung ass, geet en ëmmer weider riicht aus - ausser e gëtt vun enger Kraaft emgelängt oder gebremst. Dat kennt een och vum Auto. Wann dee bis a Bewegung ass, ass e schwéier en ze bremsen. Et seet een den Auto huet vill Inertie.

An déi Inertie verhënnert datt mer faalen?

Nee, just indirekt. Wann‘s de um Vëlo fiers an z.B. no riets kipps da renkels de automatesch liicht no riets. Wéinst denger Inertie gees de awer nach riicht aus, an dat mécht datts du rëm opgezu gëss. Beim riichtaus fuere maache mir di ganzen Zäit kleng Kéieren no riets an no lénks, an et ass ëmmer dës Inertie déi mécht datt mer net ëmfalen. Wat ee méi séier fiert oder wat ee méi schwéier ass, wat dat besser geet.

An am Stoen do hu mer keng Inertie, an dofir fale mir?

Genee. Fir ouni ze fuere stoen ze bleiwen ass immens schwéier an et brauch een e gutt Gläichgewiicht.

Auteur:  André Mousset (Physiker)
Editeur: Joseph Rodesch (FNR)
Photo © Shotshop.com

Infobox

Mister Science op Eldoradio

All 2 Wochen beäntwert de Mister Science op Eldoradio är Froen.
Scheck och deng Fro op: mister.science_at_fnr.lu

Auch in dieser Rubrik

duschen
Grouss Botz Wéi dacks soll een duschen?

Duschen erfrëscht de Kierper an d’Séil. Mee wéi dacks ass gutt oder schlecht fir eis Haut?

FNR
Aus 215 Meter Héicht Eeër-Challenge vun enger RTL-Antenn zu Jonglënster

E réit Héngeree kann eng Chute aus 215 Meter Héicht iwwerliewen. Wéi dat geet, a firwat de Mr Science mam Olivier Catani NACH op den héige Sendemast eropgeklommen ass, gitt der am Video gewuer.

FNR
Screentime fir Kanner Wéi vill Zäit sollte Kanner virum Ecran verbréngen?

Smartphone, Spillkonsol, Telé, Computer - grouss oder kleng Ecranen si jo haut fest an eis Liewen integréiert. Mee wéi vill Screentime ass eigentlech gutt a wéini soll ech agräifen, Mr Science?

FNR