
(c) Zurijeta/Shutterstock
Gëtt et eng wëssenschaftlech Excuse fir hemmungslos ze naschelen?
Kichelcher, Stolle, Buche, Liefkuch, …. heiansdo ass et wierklech schwéier fir sech zeréckzehalen. Mee firwat hu mer eigentlech heiansdo sou fuerchtbar Loscht op Séisses a kennen dann einfach net widderstoen?
Do ginn et e puer nei Studien, déi weisen drop hinn, dass et e biologesche Grond dofir gëtt.
Dat klengt interessant! Gëss de eis elo eng biologesch Excuse fir hemmungslos ze naschelen?
Naja, dat Ganzt ass natierlech och eng Saach vu Gewunnecht an Iesskultur. Mee d’Studie weisen, dass eise Kierper Kuelenhydrater, am Beschten Zocker, brauch, fir e bestëmmte wichtegen Hormon hierzestellen, an zwar Serotonin! Serotonin ass eng Substanz an eisem Gehir, déi e ganze Koup Nerveprozesser kontrolléiert. E bëssen esou wéi den Tower um Fluchhafen!
Dat heescht den „Tower“ an eisem Gehir brauch Zocker, fir d’Kontroll ze behalen?
Genee, du selwer brauchs awer eigentlech keen Zocker z’iessen! De Kierper kann dee selwer aus aner Kuelenhydrater hierstellen. Wann de Serotonin all verbraucht ass, da gëtt e ganze Prozess am Kierper ausgeléist, fir neien Serotonin hierzestellen! Dofir brauch de Kierper Zocker. Direkt Zocker iessen ass an deem Fall méi einfach fir de Kierper, da brauch en en net selwer ze maachen! Dofir gräife mir da sou gäer no de Kichelcher.
Ah! Et ginn dach och esou Diäten, wou’s de guer keng Kuelenhydrater ess, a keen Zocker! Dat ka jo da guer net funktionéieren!
Nee, net wierklech! Fréier oder spéider fälls de dann hemmungslos iwwer Séissegkeeten hier! Mee wann’s de dech richteg an ausgeglach erniers, dann hues de dee ganze Problem net, well däi Kierper ëmmer genuch Kuelenhydrater huet fir selwer Zocker ze produzéieren. Wann’s de da Loscht op eppes Séisses hues, dann ass et just eng Saach vu Gewunnecht!
Wann een also reegelméisseg bësse Kuelenhydrater ësst, dann huet ee keng Excuse, op mannst keng biologesch, fir hemmungslos ze naschelen! Weideres zu der Biologie vum Naschelen an der Infobox!
Auteur: Corinne Kroemmer
Foto © Zurijeta/Shutterstock