Tokyo 2021

Adobe Stock

Na ja, et gëtt jo de Sproch „Sport ass Mord. A Massesport ass Massemord“. Mä dat ass natierlech déck iwwerdriwwen. All kierperlech Aktivitéit, déi bei d'Sportlerin oder de Sportler passt an an engem räsonabelen Ausmooss bedriwwe gëtt, ass gutt fir de Kierper. Fir Ufänger*innen ass dat natierlech kee Leeschtungssport, fir bei der Olympiad matzemaachen. Well et kann ee sech beim Sport och wéidoen an dem Kierper schueden, zum Beispill un de Gelenker oder un engem Organ wéi dem Häerz. Mä an deem Fall hat ee meeschtens schonn déi eng oder aner Virerkrankung, e puer Kiloen ze vill an et ass een de Sport ouni déi néideg Preparatioun ugaang. Dowéinst rode Wëssenschaftler*innen: Et ass besser, et lues unzegoen a sech keng ze ambitionéiert Ziler ze setzen.

A bei wéi engem Sport verbraucht een am meeschten Energie?

Déi meeschte Kalorië gi bei Sportaarte verbrannt, bei deene vill a grouss Muskelgruppen involvéiert sinn: Schilaanglaf, Skaten, Badminton oder Squash. Hei mécht ee grouss Beweegungen, bei deenen ee wäit aushuele muss – en plus séier hannereneen. Dat si ganz intensiv Beweegungen, déi vill Muskele gläichzäiteg aktivéieren. Ganz vill Kalorië ginn och bei sougenannte Cross-Fit-Sessions verbrannt, bei deenen een ofwiesselend séier acceleréiert, Streckspréng, Pompelen, Säit- oder Ausfallschrëtt mécht. Am beschten ass et, ganz vill esou Beweegungen ze maachen a ganz séier hannereneen.

Léisst en héije Kaloriëverbrauch op e speziell ustrengende Sport schléissen?

Net onbedéngt. Et kann ee jo Kalorien entweeder wärend ville Stonne verbrauchen – oder a kuerzer Zäit. Dat Lescht ass virun allem bei héichintensiven, séiere Sportaarte wéi Badminton a Squash de Fall. Déi empfënnt een dowéinst als besonnesch ustrengend. Ausdauernd Goen oder Vëlofueren dogéint schéngen net esou ustrengend ze sinn. Mä wann s du dat reegelméisseg e puer Stonnen an der Woch méchs, da wäerts du séier mierken, dass du Kalorië verbrenns.

Wéi vill Kalorië ginn normalerweis verbrannt, wann ee sech beweegt?

Duerchschnëttlech verbrennt de Kierper ongeféier dat 1,6-Facht vum Verbrauch, wann ee sech ausrout – also vum Energiebedarf am Sëtzen, Stoen oder Leien. Wann ee sportlech aktiv ass, da kënnt nach eppes dobäi. Bei dräi Stonne Wanderen zum Beispill ginn 1000 bis 1500 Kilokalorien zousätzlech verbrannt. De Rot vu Sportwëssenschaftler*innen ass: all Dag mindestens 300 bis 500 Kilokalorien zousätzlech zum Energiebedarf am Rouzoustand ze verbrennen.

Wat heescht dat konkret? Wéi vill Beweegung ass sënnvoll?

Et liest een dacks, et soll een all Dag zirka 10.000 Schrëtt goen. Geet een der méi, dann hëlt den zousätzlechen Notze lues a lues of. Mä d'Fuerschung weess an der Tëschenzäit: Och scho bei ronn 6000 Schrëtt am Dag bréngt dat ganz vill fir d'Gesondheet an d'Liewensqualitéit. D'Weltgesondheetsorganisatioun recommandéiert 150 Minutte moderat sportlech Ustrengung an der Woch. Dat kann alles Méigleches sinn: Spadséieren, Wanderen, Vëlofueren oder Lafen. Wichteg ass, dass ee reegelméisseg Sport mécht an dobäi vill Muskelgruppen aktivéiert ginn. Aktuell Etüde beleeën: Scho ronn 50 Minutten Joggen an der Woch mat engem Tempo vun zirka 10 Kilometer an der Stonn reduzéieren de Risiko, un enger Häerz-Kreeslaf-Erkrankung oder Kriibs ze stierwen, ëm bis zu 30 Prozent. An och d'Warscheinlechkeet, krank ze ginn, geet erof. D'Fuerschung léiert permanent bäi. Et bleift spannend.

Infobox

Wéi sech de Kaloriëverbrauch moosse léisst

Fir erauszefannen, wéi vill Kalorië bei enger bestëmmter sportlecher Aktivitéit verbraucht ginn, benotzt d'Fuerschung normalerweis déi sougenannte Spiroergometrie. Heibäi kritt d'Testpersoun eng Otemmask opgesat. Duerno gëtt gemooss, wéi vill Sauerstoff d'Muskelen opgeholl hunn. De Prinzip dobäi ass einfach: Et gëtt gemooss, wéi héich de Sauerstoffundeel an der Otemloft virum Sport war a wéi héich en duerno ass. De Kierper muss d'Differenz opgeholl hunn. Aus den exakte Wäerter léisst sech de Kaloriëverbrauch ganz genee aschätzen. Mä och Fitnesstracker, déi ee beim Sport undeet, a Smartwatches kënnen den Energieëmsaz vum Kierper bestëmmen. D'Apparater benotzen dozou eng Kombinatioun ënner aneren aus der Häerzfrequenz, déi um Handgelenk gemooss gëtt, an dem zréckgeluechte Wee, dee GPS-Signaler verroden. Wann och nach d'Gewiicht an d'Geschlecht bekannt sinn, kann d'Technik berechnen, wéi vill Kalorië verbrannt ginn. Eng 2019 verëffentlecht Etüd huet bestätegt, dass d'Resultater vun esou Minicomputere relativ genee sinn.

Auteur: scienceRELATIONS (Ralf Butscher)
Editeur: Michèle Weber (FNR)
Iwwersetzung: Danièle Di Cato (why vanilla?)

Infobox

Quellen
De Mr Science op RTL RADIO

Dëse Reportage gouf an Zesummenaarbecht mat RTL Radio ausgeschafft an op der Antenne vun RTL Radio diffuséiert. All zweet Woch présentéiert de Mr Science op RTL Radio wat fir eng Fuerschung hannert Objeten aus dem Alldag stécht. All d’Emissioune fënns du hei : http://radio.rtl.lu/emissiounen/science/

Aussi intéréssant

Warscheinlechkeete fir e Gol Statistik Eelefmeterschéissen: besser uewen, ënnen, lénks oder an d'Mëtt?

Wéi grouss ass d'Warscheinlechkeet, datt de Ball erageet, je nodeems wéi een en Eelefmeter schéisst? Et gëtt och en Ënne...

FNR
Étude avec des coureurs L'amorti des chaussures comme facteur de risque possible pour les blessures en course à pied ?

Dans un projet de recherche commun, le LIH et le Decathlon SportsLab ont étudié la relation entre l'amortissement des ch...

LIH
Les réactions visuo-motrices au tennis de table Vitesse de réaction : c’est le cerveau qui fait la différence

Temps de réaction des pongistes : des scientifiques identifient les processus visuels dans le cerveau comme étant déterm...

Aussi dans cette rubrique

Mullen
Et kënnt op den “r” un Firwat fänkt d'Mullesaison am September un?

Am Hierscht sti se nees an de Restauranten op der Kaart: Mullen. Mä firwat kommen d'Muschelen eréischt am September nees op den Dësch?

FNR
Zero Waste
Eng Welt ouni Offall Wat bréngt “Zero Waste“?

Duerch bewosste Konsum, schounenden Ëmgang mat Rohstoffer a virun allem Offallvermeidung wëll Zero Waste hëllefen, eis Ëmwelt ze retten. Wéi relevant ass des Beweegung? A wat funktionéiert?

FNR
Muschel rauschen
Mier a Plage to go Firwat héiert een a verschiddene Muschelen d'Mier dauschen?

Hält een eng Muschel un d'Ouer, da mengt een, et géif een d'Mier dauschen héieren. Mä wou kommen dës Geräischer a Wierklechkeet hier?

FNR