shotshop.com
Salopp kéint ee soen: well Schlagsahn kee Bauschaum ass. Dee gëtt nämlech haart, nodeems sech de Schaum forméiert huet. Schlagsahn dogéint ass ee mëlle Schaum. Déi kleng Loftbléisecher an der Schlagsahn, sinn an engem dräidimensionalen Netzwierk aus klengen uneneen pechenden Fettkuggelen gefaangen. Déi stamen aus der Mëllech a bestinn aus dem selwechte Fett, mat deem och Botter gemaach gëtt. Bei Zëmmertemperatur ass dëst 3D-Fettnetz mëll an d’Loftbléisecher kënne mat der Zäit erausgoen, de Schlagsahn-Schaum fält a sech zesummen.
Kënnt vun do och den Tipp, fir méiglechst kal Ram ze huelen fir ze klappen?
Genee. Am beschten ass och d’Schossel an där se geschloe gëtt, an den Apparat, mat deem een se réiert gëtt, kill. Esou kënne Loftbléisecher, déi beim Schloen entstinn, net erëm direkt aus der Schlagsahn entwëschen, well d’Fettgerüst méi steif ass.
Wat geschitt iwwerhaapt genee wann ee Schlagsahn mécht?
Dat hunn viru kuerzem chinesesch Fuerscher mat bis ewell onerreechter Genauegkeet opgekläert: Mam Schnéibiesem, schléit ee Loftbléisecher an d’Schlagsahn. Déi hunn dann ähnlech wéi Seefeblosen eng reng Haut aus Mëllech-Eewäiss ëm sech. Gläichzäiteg gi beim Schloen déi kleng Fettkugelen, déi an der Schlagsahn schwammen, uneneegedréckt. Si kënnen doduerch matenee verpechen. Mat engem Schlag verpechen ëmmer méi Fettkugelen, si produzéieren een dräidimensionaalt Fettnetzwierk, an deem d’Loftbléisecher festhänken.
A firwat kann ee Ram och „iwwerschloen“, sou datt Botter entsteet?
Wann een d’Ram ze laang schléit, dréckt een d’Fettkugelcher ëmmer weider uneneen. Si lageren sech dann zu ëmmer méi grousse Fettklompen zesummen an dat ass näischt aneschters wéi Botter.
Wat ass iwwerhaapt Ram?
Wann ee frësch gestrache Koumëllech stoe léisst, stockéiert sech un der Uewerfläch eng Ramhaut of. Si besteet aus Fettkugelcher, déi lues erëm erop geklomme sinn. Wann een elo déi iewescht Schicht vun der Mëllech erofschäfft, kritt een eng immens fetthalteg Mëllech an dat ass näischt anescht wéi Ram. Fréier huet ee Gedold gebraucht, haut gëtt dat ganzt acceleréiert, an deem ee Mëllech zentrifugéiert, also am Krees geschleidert gëtt. Doduerch klammen d’Fettkugelcher méi séier erop. Wa méi wéi 30 Prozent Fett an der sou hiergestallter Mëllech enthalen ass, dierf si sech Ram nennen.
Schlagsahn aus der Spraydous
An Spray-Schlagsahn ass Gas ënner Drock geléist. Wann d’Schlagsahn aus der Dous sprëtzt, fält den Drock op ee mol, de Gas bilt vill kleng Gasbléisecher. Ähnlech wéi am Cremant kuerz nom Opmaache vun der Fläsch. Och an der Spray-Schlagsahn gëtt de Schaum duerch een Netzwierk aus Fettkugelcher stabiliséiert. Well si awer anescht wéi beim Schloen net esou fest uneneengedréckt gi sinn, ass d’Netzwierk nach manner stabil wéi a geschloener Schlagsahn. Spray-Schlagsahn fält dowéinst séier erëm a sech zesummen. Fir dat ze ëmgoen, mecht een an der Reegel Schaum-Stabilisatoren dobäi, déi aus Gelatine oder Stäerkt hiergestallt ginn.
Auteur: Ingo Knopf / scienceRELATIONS
Editeur: Joseph Rodesch (FNR)
Iwwersetzerin: Melanie Reuter (FNR)
Infobox
All 2 Wochen beäntwert de Mr Science op Eldoradio eng Fro.
