AdobeStock/Igor Link
D’Gummimëschung an de Profil si bei Wanter- a Summerpneuen anescht.
Wanter- a Summerpneuen ënnerscheeden sech an 2 Punkten: d’Gummimëschung an de Profil. D’Elastizitéit vu Gummi ass temperaturofhängeg. De Gummi am Summerpneu gëtt bei niddregen Temperature méi séier haart an da rutscht de Pneu op der Strooss. Am Wanterpneu ass dofir méi en héijen Undeel u Weichmacher an Kiselsaier an der Gummimëschung, fir dass de Pneu och nach elastesch bleift a gutt op der Strooss pecht, wann et kal ass.
Wat mengs du mat „kal“?
Ma et schwätzt ee vun der 7-Grad Grenz. Ënner siwe Grad ass e Wanterpneu besser.
A wat ass dann den Ënnerscheed am Profil?
De Wanterpneu besteet aus eenzelne Bléck, an deene sou wellefërmeg Rille sinn. Déi gi beim Fueren auserneegedréckt an d‘Kant vun de Rille bäisst dann an d’Uewerfläch vun der Strooss, wat bei Schnéi an Äis extra Gripp gëtt. Ee Wanterpneu huet bis zu 3000 där Rillen.
Wéi schlëmm ass et da wann een am Wanter mat Summerpneue fiert?
De Bremswee verlängert sech. Wann ee mat Summerpneue mat 80 km/h op Schnéi bremst, kann een iwwer 30 Meter méi wäit rutsche wéi mat Wanterpneuen! Mee och mat Wanterpneuen kann de Bremswee bei där Vitesse je no Temperaturen nach laang sinn. Do hëlleft also just méi lues fueren.
An am Summer mat Wanterpneue fueren?
Besser net. Duerch d’Hëtzt entsteet am Summer méi Reiwung tëscht der Strooss an dem Pneu, an e Wanterpneu notzt da méi séier of. Ausserdeem verbraucht den Auto méi Bensinn. A laut engem Test vum ADAC ginn et och Sécherheetsrisiken. Je no Temperatur an Zoustand vum Wanterpneu kann de Bremswee op dréchener Strooss bei 100km/h sech am Verglach zu Summerpneuen em bis zu 16 Meter verlängeren.
Wéi ass et da mat All-Weather-Pneuen? Dat schéngt mer jo eng ideal Léisung.
Jein. Den All-Weather-Pneu huet däitlech manner Rille wéi de Wanterpneu an d’Gummimëschung ass och eng Mëttelléisung. Dëse Pneu ass praktesch a Länner, an deenen d’Temperaturënnerscheeder tëschent Summer a Wanter net sou grouss sinn.
Mee bei eis kann et jo awer scho mol ganz kal ginn an et kann och Schnéi falen. Do ass ee mat richtege Wanterpneue wuel nach ëmmer am séchersten ënnerwee. Weider Informatiounen fannt dir wéi ëmmer an der Infobox!
Auteur: Michèle Weber (FNR)
Editeur: Georges Thielen (formerly at Goodyear Innovation Center)
Joseph Rodesch (FNR)
Infobox
All zwou Woche beäntwert de Mister Science op Eldoradio är Froen.
Schéck och deng Fro op: mister.science_at_fnr.lu
De Goodyear Innovation Centre (GIC*L) zu Colmar-Bierg entwéckelt, baut an test nei Pneue fir den europäeschen, asiateschen an afrikanesche Maart. Iwwer 900 Ingenieuren, Wëssenschaftler an Techniker schaffen hei un neien Materialer a probéieren andauernd, d’Qualitéit vum Gummi ze verbesseren. www.goodyear.com
