
(C) Shotshop
Kann d’Méisproochegkeet Kanner duerchernee maachen a souguer Sproochréckstänn verursaachen?
Kanner, déi méisproocheg opwuessen, mëschen d’Sproochen dacks. Si benotzen zum Beispill an engem Saz Wierder aus verschiddene Sproochen („ech si fatigué“) oder soen den Ufank vum Wuert an enger Sprooch, mee d’Endung an enger anerer („Wolkão“). D’Sprooche vermëschen ass awer ganz normal an heescht net, datt d’Kanner hir Sproochen dowéinst verwiesselen.
Och méisproocheg Erwuessener vermëschen hir Sproochen dacks a Kanner maachen dat genee esou.
D’Meilesteng vun der Sproochentwécklung si genee déi selwecht bei engem méisproochege wéi bei engem monolinguale Kand. Méisproocheg Kanner fänken net méi spéit u mat schwätzen an hir Sprooch entwéckelt sech och net méi lues wéi déi vu Kanner, déi just eng Sprooch schwätzen.
Et ass allerdéngs wouer, datt méisproocheg Kanner dacks liicht méi schwaach Sproochresultater weise wéi Kanner, déi nëmmen eng Sprooch schwätzen, wann si a just enger vun hire Sprooche getest ginn. Dat ass awer ganz normal an ass och keng Indikatioun fir ee Sproochréckstand. Méisproocheg Kanner muss een an all hire Sproochen testen, fir eng richteg Iddi vun hire Sproochfäegkeeten ze kréien.
Auteuren/Kontakt: LEARN
Photo © Shotshop.com