D’Maiti Lommel a séngem Labo op der Uni Lëtzebuerg
Lëtzebuerger Fuerscher vun der Uni Lëtzebuerg hu vru kuerzem e Biomarker (Erklärung an der Infobox) a Broschtkriibszellen identifizéiert deen ukënnegt, dass e bestëmmte Kommunikatiounswee an den Zellen deregléiert ass. Kommunikatiounsweeër (Erklärung an der Infobox) kënnen d’Zell zum Beispill dozou bréngen, sech méi séier ze deelen oder méi laang ze iwwerliewen. Deregléiert Kommunikatiounsweeër kënnen eng Ursaach vu Kriibs sinn.
D’Equipe vum Elisabeth Schaffner-Reckinger a Maiti Lommel huet erausfonnt, dass de sougenannten ERK/MAPK Kommunikatiounswee eng bestëmmt Protein aktivéiert déi wichteg fir d’Zellstruktur ass, déi sougenannt L-plastin. Esou kënne Fuerscher d’Conclusioun zéien, dass wann d’L-plastin an aktivéierter Form präsent ass, dass dann de Kommunikatiounswee an den Zellen deregléiert ass. De Biomarker indiquéiert hei eng Uersaach vu Kriibs déi ee geziilt bekämpfe kann.
Geziilt Kriibstherapie versus Chemotherapie
Nei, sougenannt “geziilt” Therapiemethodë probéiere genau dës Kommunikatiounsweeër ze bremsen. Am Géigesaz zu Chemotherapien, déi all Zellen ugräifen, déi sech séier deelen, gräifen dës nei Methoden nëmmen déi Zellen un, an deenen ee bestëmmte Kommunikatiounswee net méi normal funktionéiert. Dofir hunn dës geziilt Therapiemethodë manner staark Niewewierkungen ewéi d’Chemotherapien. Wa méiglech ass et also d’Zil, op geziilt Therapien zréckzegräifen, an op Chemotherapien ze verzichten.
Uwendung vu geziilter Kriibstherapie am Fall vun aktivéierter L-plastin?
D’Fuerscher vun der Uni Lëtzebuerg hunn d’Aktivatioun vun der L-plastin ënnersicht an dofir hu si aggressiv Broschtkriibszelle mat manner aggressive verglach. Déi aggressiv Broschtkriibszellen hu méi eng héich Aktivatioun vun der L-plastin gewisen, als Resultat vun engem gestéierten, hyperaktiven ERK/MAPK Kommunikatiounswee. Et géif deemno Sënn maachen dëse Kommunikatiounswee ze bremsen oder souguer ze stoppen an dofir ginn et och schonn eng Rei Medikamenter déi zum Deel fir den Traitement vun anere Kriibsaarten, wéi zum Beispill Hautkriibs, benotzt ginn.
De Wee bis zur Unerkennung vum neie Biomarker als Indikator fir eng bestëmmten Therapie
Fir dës Erkenntnisser weider ze verdéiwen, plangen d’Fuerscher elo eng Studie mat Broschtkriibszelle vu lëtzebuerger Patienten. Si wëllen ënnersichen, ob déi Tumore mat héijer L plastin Aktivatioun effektiv ëmmer en hyperaktiven ERK/MAPK Kommunikatiounswee virweisen a méi aggressiv sinn ewéi déi Tumoren ouni L-plastin Aktivatioun.
Am Fall wou d’Erkenntnisser sech confirméieren, misst eng grouss Studie mat Mais an dono mat Patiente gemaach gi fir ze ënnersichen, ob eng geziilt Kriibstherapie mam Stoppe vum ERK/MAPK Kommunikatiounswee, eventuell a Kombinatioun mat aneren Therapien, effektiv efficace géint dës aggressiv Broschtkriibsaarte wierkt.
Hei de Link op den Original-Artikel.
Zum Auteur
D’Maiti Lommel, 28, schafft op der Uni Lëtzebuerg. Hat huet am Dezember säin Doktorat erfollegräich oofgeschloss. Och a sénger Fräizäit engagéiert hat sech fir d’Wëssenschaften an hëlleft bei Pins a.s.b.l., enger Associatioun déi wëssenschaftlech Workshops fir Kanner a Jugendlecher ubidd.
Foto: D'Maiti Lommel a séngem Labo op der Uni Lëtzebuerg.
Du bass Fuerscher a wëlls och op science.lu iwwert déng Aarbecht schreiwen? Da mell dech bei eis.
Infobox
Broschtkriibs, genau wéi Kriibs am Generellen, ass eng ganz heterogen Krankheet, déi duerch vill verschidden Eegeschaften definéiert gëtt. Den Haaptgrond fir d’Entstoe vu Kriibs ass eng Verännerung am Ierfmaterial, also an der DNA, vum Patient. Dës Verännerung kann dann dozou féieren, dass zum Beispill d’Kommunikatioun teschent den Zellen oder tëschent den Zellen an hirem Ëmfeld net méi esou funktionéiert ewéi dat normalerweis de Fall ass. Ze staark Signaler kënnen d’Zell dozou bréngen, sech méi séier ze deelen oder méi laang ze iwwerliewen. An deem Fall huet de Patient Kriibs.
E Kommunikatiounswee an enger Zell ass de Wee vun engem Signal wat vun ausserhalb der Zell kënnt an dann vun der Zellmembran bis eran an den Zellplasma oder Zellkär weidergeleet gëtt.
De Bluttzockerspigel ass z.B. e Biomarker fir Diabetes. Ass de Bluttzockerspigel héich, kann dat en Indice fir Diabetes sinn. E Biomarker ass also eppes wat ee moosse ka fir de Gesondheetszoustand vun enger Persoun ze bestëmmen.
