Dokter Student an der Sportmedizin

Robert Mann, wolls du scho während dénger Lycées-Zäit an d’Fuerschung goen?

Nee, dat huet sech iwwert d’Jore sou erginn. No méngem Studium an England – engem Bachelor an der Sportswëssenschaft – hunn ech 2 Joer zu Lëtzebuerg als Personal-Trainer geschafft. Ma beemol wollt ech méi wëssen iwwert d‘Mechanismen vun der Fitness an der physescher Aktivitéit. Dowéint sinn ech dunn an Holland gaang, fir e Master an deem Berräich ze maan. Während dem Master hunn ech e Stage am Sportslaboratoire zu Lëtzebuerg gemaach – beim Prof. Daniel Theisen an Dr. Joakim Genin. Dee Stage huet mir super gefall. Duerno gouf et dunn d’Méiglechkeet fir eng Dokteraarbescht bei hinnen ze maachen – un däer ech grad schaffen. Dat wor also net alles vun Ufank un sou geplangt. 

U wat schaffs du da lo konkret de ganzen Dag?

Bei ménger Aarbescht geet et em Verletzungen, déi d’Leit beim Lafe kréien. Méi genee schaffen ech un de biomechanesche Risike vu Lafverletzungen. Ech verbrénge méng Zäit deelweis um Büro an deelweis am Labo, wou mir verschidden Technologien a Probanden testen. Mir hänken z.B. lauter Chippen un Testpersounen a filmen da mat speziellen 3D-Kameraen hier Beweegungen. Da gesi mer ganz genee, wat während der Beweegung geschitt a wéi d’Schanken a Gelenker reagéieren.

Wat ass spannend un dénger Aarbescht?

An der Fuerschung entwéckelen sech d’Saachen dachs ganz séier. A bei mir ass dat och sou: Obwuel ech eng gewësse Struktur a ménger Doktoraarbescht hun, kënnt et ganz oft zu Problemer, wou séier eng Léisung muss fonnt ginn. An dat mëscht d’Fuerschung sou interessant.

A wat ass net sou spannend?

Mir hunn heiensdo Phasen, an deene ganz vill Donneeën mussen traitéiert ginn. Deen Ament ass d’Aarbescht e bëssi monoton.

Wëlls du no déngem Doktorat gäer an der Fuerschung bleiwen?

Mäin Ziel am Ufank wor fir méi Wëssen iwwer Sport a physesch Aktivitéit ze kréien. Wann ech mat méngem Doktorat fäerdeg sin, géif ech gäer dat Wëssen uwenden. Ausserdeem wéilt ech gäer d'Populatioun vu Lëtzebuerg oder soss iergendwou méi beweeglech man. Ech kann awer lo net deefinitiv soen, wat ech an der Zukunft genee wäert man.

Auteur: Jean-Paul Bertemes (FNR)