Lëtzebuerger Sprooch a Kultur

D’Universitéit Lëtzebuerg offréiert och dëst Joer erëm zwou Formatiounen am Beräich vun der Lëtzebuerger Sprooch  a Kultur. D‘Formation continue Lëtzebuerger Sprooch a Kultur riicht sech u jiddereen, deen interesséiert ass, am Beräich vun der Erwuessenebildung déi lëtzebuergesch Sprooch a Kultur ze enséignéieren a genee esou u Leit, déi schonns als Lëtzebuergeschenseignant schaffen an hiert Wëssen ofsécheren an erweidere wëllen.

Viraussetzung fir sech an dëser Formatioun anzeschreiwen sinn e Premièresdiplom a mammesproochlech Kompetenzen am Lëtzebuergeschen. Kandidature fir dat nächst Studiejoer gi bis den 10. September ugeholl. D’Coursë sinn all Freideg vun 8h15u bis an de fréien Nomëtteg um Walfer Campus vun der Uni. D’Sprooch vun de Coursen ass Lëtzebuergesch.

Lëtzebuerger Studien op der Uni Lëtzebuerg

Zënter e puer Joer bitt d’Universitéit Lëtzebuerg de Master en langues, cultures et médias – Lëtzebuerger Studien un. Dës Formatioun bilt Experten aus, déi net op eng Disziplin fixéiert bleiwe wëllen, an interdisziplinäert Wëssen a Kompetenzen an de Gebidder vun der Lëtzebuerger Sprooch, der Literatur, der Kultur an de Medie sech uneegne  wëllen an dës och an der Beruffswelt uwenne kënnen. Während dem Studium kënnt Dir praktesch Erfahrunge sammelen, Pionéieraarbecht an der Recherche maachen a mathëllefen, eng nei Disziplin op- an auszebauen.

Viraussetzunge sinn e Bachelorofschloss an der Philologie (franséisch, däitsch oder englesch, o.ä.), an der Konscht, de Mediewëssenschaften, der Geschicht oder anere Kulturwëssenschaften, souwéi Sproochekenntnisser am Lëtzebuergeschen, Däitschen a Franséischen (e gudden Deel vun de Coursë gëtt op Lëtzebuergesch gehalen).

Online-Aschreiwunge si méiglech bis den 1. September 2014.

Weider Informatioune um Internet op http://laf.uni.lu (Formation continue Lëtzebuerger Sprooch a Kultur) an op http://malux.uni.lu (Master en langues, cultures et médias – Lëtzebuerger Studien) oder per Mail:  melanie.wagner@uni.lu