Lëtzebuerg huet eng zolitt Fuerschung op d’Bee gestallt. Zäit fir deen Know-How och verstäerkt gesellschaftlech ze notzen, ë.a. an der Politik. E Commentaire vum Marc Schiltz, Generalsekretär vum FNR.
Klimawandel, Renteproblematik, Energieversuergung, Gentechnik, Big Data… ëmmer méi bestëmme komplex, fuerschungsintensiv oder héichtechnologesch Beräicher eis Zukunft. Beräicher an deene wëssenschaftlech Expertise eng wichteg Roll spillt – an iwwert déi Politiker musse befannen. Sollte Politiker dobäi net och op den Know-How vun der Fuerschung zréckgräifen?
Kee ka vun engem Politiker verlaangen, dass en an all Domaine en Expert ass. Fir politesch Decisiounen op dem aktuelle Stand vun der Wëssenschaft ze baséieren, brauche si Ënnerstëtzung – musse si kënnen op den Know-How vun Experten zréckgräifen.
Am Ausland, wéi z.B. an England, ass et ganz natierlech, dass Politiker bei Fuerscher ëm Rot froen. Fuerscher versichen och selwer proaktiv Politiker a verschidden Dossieren ze beroden. Och zu Lëtzebuerg gräife Politiker op den Know-How vun Experten zréck. Ma et weist sech, dass den Echange tëscht de Politiker an de Fuerscher hei zu Lëtzebuerg nach an de Kannerschong stécht.
Mir hunn zu Lëtzebuerg an de leschte Joren eng zolitt Fuerschung opgebaut, déi international ëmmer méi renomméiert ass.
Et ass un der Zäit den Know How vun de Fuerscher verstäerkt ze notzen.
Wichteg heibäi ass awer, dass béid Säiten sech nach besser kenneléieren. Wéi funktionéieren déi jeeweileg Prozesser, wat sinn déi jeeweileg Contrainten? An a wéi engen Domainer hu mir iwwerhaapt Fuerscher hei zu Lëtzebuerg? Sou gëtt zu Lëtzebuerg z.B. am Beräich Multilinguismus gefuerscht, wou interessant Erkenntnisser fir de méisproochege lëtzebuerger Educatiounssystem gesammelt ginn. Fuerschung iwwert sozial Ongerechtegkeeten, iwwert den Aarbechtsmaart an der Grenzregioun kënnen wichteg Informatiounen fir d’Gestaltung vun der Wirtschafts- a Sozialpolitik liwweren.
Roll vum Politiker - Roll vum Fuerscher
Wichteg ass awer och, dass béid Säiten hier respektiv Roll kennen an respektéieren. D’Roll vum Fuerscher ass net, politesch Decisiounen ze huelen. Des Verantwortung ass a bleiwt beim Politiker, deen nieft de wëssenschaftlechen Donnéeën natierlech och sozial, budgetär a politesch Aspekter muss consideréieren. D’Roll vum Fuerscher ass och net fir am pejorative Sënn bei de Politiker Lobbying ze bedreiwen. Ma vill méi geet et drëms fir dem Politiker a konkreten Dossieren relevant Fakten zur Verfügung ze stellen an hien am Entscheedungsprozess berodend ze begleeden.
Ressource fir d'Zukunft vum Land: d'Matière Grise vun der Bevölkerung
Mir hun zu Lëtzebuerg kaum nach natierlech Ressourcen. Eis Ressource fir d’Zukunft ass d’matière grise. An et gëllt, dës maximal gesellschaftlech ze notzen. Dozou gehéiert och, den Echange tëscht Fuerscher a Politiker z‘ënnerstëtzen.
Dovunner profitéiere mer schliisslech all: d’Politiker, andeems se Decisioune kënnen huelen, déi op wëssenschaftleche Fakte baséieren. Fuerscher, andeems se de gesellschaftlechen Impakt vun hierer Fuerschung erhéijen. An d’Gesellschaft, andeems den Invest vum Steierzueler maximal genotzt gëtt.
Auteur: FNR
